DILI, 05 Novembru 2025 (TATOLI)-Xefe bankada opozisaun husi Partidu Frente Revolusionária Timor-Leste Independente (FRETILIN), Aniceto Longuinhos Guterres, preokupa ho alokasaun verba iha proposta Orsamentu Jerál Estadu (OJE) 2026 ba setór produtivu ne’ebé ki’ik.
Tuir bankada nia haree, proposta OJE ne’ebé Governu aprezenta ho montante boot la reprezenta esforsu atu kria sustentabilidade fiskál ba Timor-Leste nia futuru, tanba la konsege aprezenta programa diversifikasaun ekonómika no subtituisaun petróleu hafoin kampu mina-rai Bayu Undan maran ona.
Nia dehan husi totál proposta OJE 2026 $2.214.689.195, Governu sei gasta billaun $1.8 ba de’it despeza rekorente no uitoan de’it ba kapitál dezenvolvimentu. Ida-ne’e ilustra Fundu Petróleu la uza ona ba investimentu ekonomia tempu naruk nian.
“Tanba ita hakarak diskusaun ida franka no aberta, iha uma fukun povu nian ida-ne’e.Ami apresia diskursu Primeiru-Ministru iha intervensaun introdutória, liuliu parte ida ko’alia kona-ba transformasaun ekonómika iha 2026’’, nia hato’o iha debate proposta OJE 2026 iha faze jeneralidade loron dahuluk, iha Parlamentu, ohin.
Nia hateten kreximentu ekonómiku kontribui boot liu mak konsumu família ne’ebé osan despeza mai husi rekorente orsamentu Estadu no remesa husi traballadór timoroan iha rai-li’ur.
Hodi preokupa katak país nia ekonomia depende ba importasaun, tanba kuaze sasán hotu importa husi rai-li’ur, nune’e osan sai hotu.
“Signifika ita-nia dezenvolvimentu eknómiku la la’o ka laiha. Kreximentu ekonómiku sira ne’ebé ita ko’alia la kontribui signifikativu’’, nia preokupa.
Nia dehan loloos ida-ne’e sai motór ba aranka kreximentu ekonómiku aas liután no sustentavel ba iha diversifikasaun ekonómika iha setór produtivu.
Nia nota katak Governu seidauk halo rasionalizasaun tanba osan despeza rekorente sa’e nafatin.
“Ba Fretilin, Governu Dasiak tenke hadi’a iha nia orsamentu laran, nune’e salva ekonomia no futuru ita-nia rai, espesialmente bainhira Fundu Petróleu hotu sedu, tanba de’it gasta barak la ho kálkulu prudente’’, nia lamenta.
Nia dehan proposta OJE ne’e la priotiza ba setór importante hanesan saúde, edukasaun no agrikultura, tanba hetan alokasaun orsamentu ki’ik.
“Alokasaun orsamentu ba tinan oin 1.9% ba agrikultura, sai mós kauza ita labele sai nasaun produtora, maibé kontinua sai importadora’’, katak.
Iha fatin hanesan, deputadu Partidu Libertasaun Populár (PLP), Adolfo Martins, hateten setór produtivu, liuliu agrikultura nia alokasaun orsamentu ba tinan oin hetan de’it 1.9%, mezmu tuir sensu populasaun 66% populasaun Timor-Leste moris dependénsia ba agrikultura, maski setór ida-ne’e renovavel.
Hodi husu prioriza alokasaun orsamentu ba hasa’e produsaun kafé, tanba sensu 2019 hatudu populasaun munisípiu hitu rendimentu mai husi kafé. No nesesita diversifika ekonomia ne’ebé foku ba hasa’e produsaun rai-laran atu kontribui ba redús ki’ak, má nutrsaun no inseguransa ai-Han.
Xefe bankada Kmanek Haburas Unidade Timoroan (KHUNTO), Antonio Verdial de Sousa, hato’o apresiasaun ba Governu ne’ebé aprezenta proposta lei OJE tuir tempu.
Nia mós preokupa kona-ba presipísiu fiskál tanba país kontinua depende ba Fundu Petrolíferu, nune’e proposta OJE atu haree dezafiu reál hodi harii futuru ida reziliente no prosperu, nesesita duni diversifikasaun ekonómika, reforma fiskál no estruturál hodi iha sustentabilidade.
Notísia relevante: https://tatoli.tl/2025/11/05/oje-2026-governu-kontinua-tau-investimentu-ba-setor-produtivu-hodi-hasae-reseita/
Jornalista: Nelson de Sousa
Editora:Maria Auxiliadora
