DILI 07 Novembru 2025 (TATOLI)–Ministériu Turizmu no Ambiente (MTA), Sesta ne’e, halo abertura ba kompetisaun Eskola Verde 2025 ba Eskola Ensinu Báziku 3⁰ Siklu, ne’ebé partisipa husi eskola hamutuk 26 husi Dili.
Kompetisaun ne’e iha ámbitu Kampaña Nasionál Ambientál hodi komemora loron Proklamasaun Independénsia Timor-Leste ba dala-50.
Diretór-Jerál Ambiente husi MTA, Domingos Mesquita informa, ekipa juri kompostu husi MTA, Ministériu Obra Públika (MOP), Ministériu Edukasaun (ME), no Ministériu Saúde (MS) sei halo avaliasaun ba eskola 26.
“Kompetisaun ida-ne’e la’ós de’it ba eskola sira-ne’ebé implementa ona Programa Eskola Verde, maibé mós ba eskola sira-ne’ebé seidauk implementa, ekipa sei tun avalia hotu, tanba avaliasaun ne’ebé ekipa juri sei halo, ho intensaun rua mak hanesan, kondisaun di’ak ita avalia no kondisaun ladi’ak mós ita avalia,” Diretór-Jerál dehan iha Sentru Konvensaun Dili.
Notísia relevante : Dom Martinho Lopes, eskola dahuluk iha Bobonaro implementa ‘Eskola Verde’
Ekipa juri sei avalia eskola bazeia ba kritéria prinsipál hanesan areadór eskola tenke matak, hanesan kuda ai-funan ka kuda ai, fatin tenke mós, tau lixu iha nia fatin, no di’ak liután iha prátika halo resiklajen iha eskola.
Bainhira ekipa avalia hotu mak identifika kondisaun di’ak mak sei fó prémiu no eskola ida-ne’ebé kondisaun ladi’ak bainhira iha orsamentu sufisiente sei halo intervensaun di’ak ruma.
“Ba eskola sira-ne’ebé sei sai manán-na’in, ita sei oferese tasa rotativa no permanente ne’ebé daudaun prodús ona iha Indonézia, ita mós iha orsamentu oituan ba manán-na’in sira hahú husi 1⁰ lugar to’o 6⁰ ne’ebé manán-na’in sei hetan osan ho montante boot liu $5.000 inklui tasa rotativa no permanente,” nia Jerente ne’e akresenta.
Tasa rotativa ne’e iha tanba atividade ne’e kada tinan halo nafatin no osan ne’ebé fó ba eskola sira ne’e ho intensaun kondisaun eskola ne’ebé iha hadi’a di’ak liután liuliu envolve estudante halo resiklajen iha eskola, kria lixeiru no seluk tan.
Atividade ida-ne’e kada tinan sempre loke ba munisípiu hotu maibé tinan ne’e foku liu ba Dili tanba nu’udar barometru nasaun, nune’e bele hanorin estudante sira kuidadu ho ambiente, tau lixu iha nia fatin, maibé tinan oin sei loke ba nível nasionál.
Tuir planu rezultadu manán-na’in sei fó sai iha loron komemorasaun Loron Proklamasaun Indenpendénsia ba dala-50 iha 28 Novembru.
“Buat hotu depende ba serbisu, karik tarde liu inísiu Dezembru bele distribui ona prémiu ba sira,” Diretór-Jerál katak.
Jornalista : Arminda Fonseca
Editora : Julia Chatarina
