DILI, 07 Novembru 2025 (TATOLI)–Banku Sentrál Timor-Leste (BCTL, sigla portugés), Sesta ne’e, lansa relatóriu Fundu Petrolíferu iha trimestre datoluk (Jullu-Setembru) 2025, akumula biliaun $18,95, kompara ho trimestre daruak biliaun $18,74.
Governadór BCTL, Helder Lopes informa, Lei Fundu Petrolíferu estipula katak Ministériu Finansa mak estabelese estratejia investimentu no Banku Sentrál mak halo jestaun operasionál ba investimentu.
“Relatóriu ne’e hatudu katak totál reseita ne’ebe simu iha trimestre ne’e hamutuk millaun $6,37 no rendimentu brutu husi investimentu hamutuk millaun $557,92, kompostu husi kupaun/funan no dividendu ne’ebé simu hamutuk millaun $141,95 no mudansa iha valór merkadu hamutuk millaun $415,97,” Helder Lopes hateten ba Jornalista iha edifísiu BCTL, Akait.
Notísia relevante : BCTL fó sai Relatóriu Trimestrál Fundu Petrolíferu billaun $18.97
Nia esplika, rendimentu ba karteira Fundu Petrolíferu husi merkadu finanseiru maka 3,05%, kompara ho nia sasukat (benchmark) 3,02%.
Iha trimestre ida-ne’e, totál osan ne’ebé dada sai husi Fundu Petrolíferu hamutuk millaun $355,78, ne’ebé millaun $351,95 transfere ba Konta Tezouru atu finansia Orsamentu Estadu no millaun $3,83 hodi selu kustu jestaun investimentu.
Governadór dehan, iha tinan 2025, Fundu Petrolíferu loke ho balansu biliaun $18,27, husi Janeiru to’o Setembru 2025 (year-to-date), totál reseita hamutuk millaun $24,74, totál retornu husi investimentu (depois hasai despeza no impostu) maka biliaun $1,50, no totál transferénsia ba Konta Tezouru maka millaun $852.
“Ho nune’e, dezde estabelesimentu Fundu Petrolíferu, totál reseita aproximadamente biliaun $25,27, totál retornu husi investimentu iha merkadu finanseiru hamutuk biliaun $11,78 ho média retornu anuál 4,66%, no totál levantamentu hodi finansia Orsamentu Estadu hamutuk biliaun $18,26,” Helder tenik.
Jornalista : Arminda Fonseca
Editora : Julia Chatarina
