ATAÚRU, 09 Novembru 2025 (TATOLI) – Prezidente Autoridade Administrativa Ataúru, Mateus Belo, destaka importánsia halo promosaun ba artezenatu lokál, liliu bote tradionál Ataúru, nu’udar identidade kulturál.
Nia hatoo informasaun ne’e relasiona ho feto Ataúru ne’ebé aprezenta bote tradisionál illa ne’e nian durante serimónia adezaun formál Timor-Leste hanesan membru plenu Asosiasaun Nasaun Sudeste Aziátiku (ASEAN, sigla iha portugés) ba dala-11, sai hanesan inspirasaun ida hodi reforsa kompromisu lokál ba eliminasaun totál uzu plástiku iha Ataúru.
Diferente ho rejiaun sira iha Timor-Leste, iha ne’ebé komunidade tara tais ba bainaka importante sira, Ataúru Oan sira iha kostume oferese bote ba feto sira no luhu ba mane sira.
“Ha’u mós admira tebes, maibé hanesan Prezidente Autoridade orgullu tanba ita-nia inan feton sira reprezenta Ataúru iha eventu Adezaun Timor-Leste ba ASEAN iha Malázia. Uza bote, identidade úniku Ataúru nian. Aproveita momentu ida ne’e hanesan Presidente Autoridade iha hanoin ba oin promove bote sai hanesan identidade úniku Ataúru nian,” Mateus Belo dehan iha selebrasaun Loron Feto Nasionál, iha Vila Maumeta.
Responsável ne’e afirma katak, asaun simbólika feto Ataúru iha eventu internasionál ne’e reflete moto Ataúru “moos, organizada no saudável”.
Mateus Belo informa, iha tinan oin, Autoridade Munisipál planeia halo lansamentu ba Programa Zero Plástiku, ne’ebé inklui kampaña sensibilizasaun, limpeza komunitária no kriasaun pontu rekolla rezídiu resiklajen. Autoridade ne’e afirma katak sei uza bote hodi subtitui saku plástiku sira.
Autoridade lokál ne’e mós dehan bainhira programa ne’e halo ona lansamentu, vizitór lokál no internasionál “tenke hola bote, tanba ida ne’e kultura lokál nian no mós hanesan parte ida hodi promove zero plástiku iha Ataúru, no empodera ekonomia lokál”.
Tuir nia, feto sira iha Ataúru organizadu ona iha produsaun, maibé autoridade nia servisu mak oinsá kria mekanizmu hodi fasilita asesu ba merkadu.
Notísia relevante: APCC 2025:Governu realiza feira hodi promove kultura, artezenatu no festivál kulinária
Jornalista: Ivonia Silva
Editora: Isaura Lemos de Deus
