DILI, 10 Novembru (TATOLI)-Bankada Kmanek Haburas Unidade Nasionál Timoroan (KHUNTO) prepara ona proposta kona-ba redusaun saláriu ba asesór internasionál iha debate espesialidade ba proposta Orsamentu Jerál Estadu (OJE) 2026.
Vise bankada KHUNTO, Luís Roberto, dehan asesór internasionál balun nia vensimentu rihun $10 to’o $15, liu saláriu báziku Prezidente Repúblika no órgaun soberania sira seluk, maibé haree ba produtividade serbisu nafatin.
Tuir nia, ida-ne’e dezvaloriza rekursu timoroan ne’ebé iha, mezmu iha rekursu kualifikadu barak tebes. “Durante ne’e ita garante ba fundu ida de’it, ita atu halo poupansa, Governu tenke hatene ona halo redusaun ba iha saláriu ne’ebé boot tebes ba asesór internasionál sira”, nia hateten iha Parlamentu Nasionál, ohin.
Nune’e, proposta KHUNTO nian husu revee saláriu tuir nivel no tarefa serbisu neebé iha, hanesan ho asesór nasionál.
“Ezemplu, asesór nasionál rihun $4 karik, internasionál fó rihun $5, labele aas demais no haree asesór ne’ebé merese ita fó osan rihun $5 ba leten, labele fó apoiu tékniku baibain [mós nia] vensimentu rihun $10 to’o $15”, dehan.
Bankada KHUN TU submete ohin proposta referida ba meza Parlamentu molok debate OJE iha espesialidade.
Lembra katak, iha 07 Novembru, Parlamentu liuhusi reuniaun plenária estaordinária aprova ona proposta OJE 2026 ho montante $2.214.689,195 iha faze jeneralidade ho votu a favór 42, kontra 0 no abstensaun 23 husi FRETILIN no PLP.
Verba ne’e aloka ba saláriu no vensimentu $476.870.249, bens no serbisu korente $447.904.446, transferénsia públika $820.710.160, kapitál menór $32.556,96, no kapitál dezenvolvimentu $436.647.379.
Ho aprovasaun ne’e sei kontinua diskusaun espesialidade iha loron 13 Novembru ho másimu diskusaun loron sanulu. Proposta lei OJE ne’e iha artigu hamutuk ualu. Iha espesialidade, diskusaun no votasaun sei halo ba kada artigu.
Tuir giaun, debate ba eventuál proposta alterasaun aprezenta até tuku 12h00 iha loron 11 Novembru. Termina diskusaun espesialidade kontinua ba votasaun iha finál globál.
Jornalista: Nelson de Sousa
Editora: Maria Auxiliadora
