DILI, 10 Novembru 2025 (TATOLI)–Komandante Komponente, Higino das Neves termina ona mandatu hanesan Komandante Komponente Navál iha fulan kotuk.
“Ha’u mós loloos troka ona, mas ha’u sei hein. Tanba ne’e, sei iha nível Prezidente Repúblika atu haree no aseita. Ne’e mak ha’u sei hein, mas ha’u mós mandatu hotu ona,” Higino hateten ba Jornalista sira iha Komponente Navál Hera, Segunda ne’e.
Notísia relevante : Forsa Austrália entrega kazera rua no toilet ida ba Komponente Navál
Tuir Estatu Militár foun, Komandante Komponente Navál ne’e asume kargu durante tinan-rua no renova tinan-ida, maibé daudaun ne’e Komandante Higino asume kargu besik tinan-haat ona.
“Iha lei tinan-rua, aumenta tan tinan-ida. Ha’u liu ona tinan-tolu, normál tinan-tolu de’it, mas ha’u iha ne’e besik ona tinan-haat,” nia akresenta.
Tuir Dekretu-Lei N.º 33/2020 02 Setembru kona-ba Estatutu foun Militár FALINTIL-Forsa Defeza Timor-Leste (F-FDTL) husi artigu 93 hateten nomeasaun ba Komandante Komponente sira:
1). Komandante Komponente sira nomea no ezonera husi Prezidente Repúblika sub-proposta husi Governu, maibé hafoin rona tiha Xefe Estadu Maiór Jenerál Forsa Armada (XEMGFA) nomós Governu liuhusi reuniaun Konsellu Superiór Militár no reuniaun Konsellu Superiór no Seguransa.
2) Kargu ba Komandante Komponente sira ba mandatu tinan-rua de’it no só halo renovasaun ba tinan-ida.
Jornalista : Natalino Costa
Editora : Julia Chatarina
