DILI, 11 Novembru 2025 (TATOLI)—Prezidente Komité 12 Novembru ein-Ezersísiu, Filipe Rodrigues Pereira, husu Governu atu aselera konstrusaun Memoriál 12 Novembru Santa Krús tanba lori tempu naruk ona maibé laiha rezultadu.
“Obra ne’e hahú iha 2021 to’o ohin loron seidauk hatudu nia progresu. Tanba ne’e, Governu tenke halais justifikasaun orsamentu nune’e entrega ba Konsellu Administrasaun Fundu Infraestrtutura (KAFI) hodi aselera prosesu,” Filipe Rodrigues hateten ba TATOLI iha resintu Ministériu Edukasaun (ME), Vila Verde, Dili, Tersa ne’e.
Tuir nia katak obra ne’e dezde Oitavu Governu nian ne’ebé halo estimasaun ba monumentu ne’e ba ema 11 iha rate leten no na’in neen (6) rate laran.
“Hosi monumentu ba ema 11 iha rate leten no nai’n-6 iha rate laran ne’e Governu anteriór prevee de’it rihun $300-resin. Ida-ne’e la to’o entaun Komité 12 Novembru tau kestaun. Tanba ikus sei problema ho nia kualidade. Ami hakarak ne’e monumentu ninia kualidade hanesan estátua João Paulo II no estátua ida iha Oekusi. Obra rua empreza hosi Portugál mak halo entaun Governu anteriór deside empreza Portugál mak atu prodús. Hosi ne’e nia montante sa’e maka’as to’o millaun $1.4. Depoiz lori ba KAFI no KAFI husu projetu nai’n Ministériu Asuntu Kombatente Libertasaun Nasionál (MAKLN) hodi halo prosesu justifikasaun mak la’o to’o agora ita la hatene osan ne’e nia justifikasaun. Prosesu ida-ne’e mak halo paradu,” nia esplika.
Notísia relevante: KAFI diskute fali prosesu konstrusaun Monumentu Memoriál Masakre Santa Krús
Maibé, nia rekoñese iha tinan dahuluk mosu dezentendimentu entre empreza ho Komité 12 Novembru inklui mosu COVID entaun nia prosesu to’o tarde.
“Maibé, ida sai problema mak rate ne’ebé iha dalan ba saudozu Sebastião Gomes nia rate ne’e. Tanba ita iha dezeñu ne’ebá ne’e mós loke dalan ba saudozu nia rate. Ida-ne’e mak servisu todan ne’ebé to’o agora seidauk bele book. Ida-ne’e responsavel hosi Autoridade Munisípiu Dili nian,” nia dehan.
Filipe esplika problema ida tan mak mákina ne’ebé atu ko’a mármore laiha forsa atu kontinua ko’a. Entaun, hanesan benefisiáriu 12 Novembru katak oinsá buka hela mármore iha fatin seluk hodi bele finaliza lalais obra ne’e.
Konstrusaun Memoriál 12 Novembru ne’e Komité 12 Novembru hamutuk ho Ministériu Asuntu Kombatente Libertasaun Nasionál (MAKLN), Ministériu Obra Públika ( MOP) depoiz ho Ajénsia Dezenvolvimentu Nasionál (ADN), Komisaun Nasionál Aprovizionamentu (CNA-sigla portugeza) no empreza konsultan mak ho ekipa ida halo prosesu produsaun Monumentu 12 Novembru.
Jornalista: Osória Marques
Editór: Xisto Freitas da Piedade
