DILI, 12 Novembru 2025 (TATOLI)–Xefe Estadu Maiór Jenerál Forsa Armada (XEMGFA), Tenente Jenerál Domingos Raul ‘Falur Rate Laek’ klarifika, adiamentu viajen Forsa Tarefa Konjunta misaun umanitária bá Filipina tanba hein autorizasaun espasu aéreu.
Kontijente sira tuir ajenda sei halo viajen bá Filipina iha Kuarta (12/11), maibé la konsege tanba Governu Timor-Leste presiza komunika ho Governu Indonézia hodi hetan autorizasaun tráfiku aéreu molok hakat bá Filipina.
“Horisehik kedan ita-nia Ministru Negósiu Estranjeiru halo kontaktu permanente hela ho Jakarta, soke espasu aéreu mak sira seidauk autoriza ne’e mak ohin ita-nia Forsa Tarefa Konjunta ne’ebé atu halo misaun umanitária iha Filipina seidauk bele bá,” Falur hateten ba Jornalista sira hafoin partisipa serimónia komemorasaun Masakre Santa Krús ba dala-34, iha rate Santa Krús, Kuarta ne’e.
Notísia relevante : Governu despede kontijente na’in-150 fó asisténsia umanitária iha Filipina
Nia esplika, Indonézia tenke autoriza espasu aéreu mak foin bele foin halo viajen iha espasu.
“Se Indonézia la autoriza espasu aéreu, entaun Timor-Leste nia aviaun labele semo iha sira-nia área. Ida-ne’e tenke hetan autorizasaun husi sira molok ita halo viajen aéreu. Tenke husu autorizasaun purke ne’e tráfiku aéreu ne’ebé sira tenke autoriza,” nia esplika.
Xefe Estadu Maiór Jenerál Forsa Armada dehan, atu rezolve ida-ne’e presiza iha loron-rua nia laran molok ekipa halo viajen.
“Ne’ebé sira iha ajenda ona iha loron 14 no 15 Novembru. Ita-nia Forsa Tarefa sei arranka husi Dili bá Filipina,” nia tenik.
Ekipa Forsa Tarefa Konjunta misaun umanitária Filipina sei arranka ho Aviaun Aero Dili.
“Sira sei bá grupu rua, tanba tuir informasaun aviaun tula ema na’in-70 no ema na’in-80 sei tuir,” nia hakotu.
Jornalista : Natalino Costa
Editora : Julia Chatarina
