BOBONARU, 12 Novembru 2025 (TATOLI) – Prezidente Autóridade Munisípiu (PAM) Bobonaru, Paulo Moniz Maia, hato’o agradesimentu no respeitu kle’an ba joven sira neʼebé mate iha akontesimentu istóriku 12 Novembru 1991, iha Semitériu Santa Krús Dili.
Nia subliña katak joven sira ne’e nia sakrifísiu mak sai hanesan fundasaun prinsipál ba Timor-Leste nia luta ba ukun rasik-an.
“Ohin loron 12 Novembru, ita komemora loron importante tebes ba ita-nia nasaun. Joven barak mak fakar ona sira-nia raan ba ukun rasik-an ida-ne’e. Maski ita-nia serimónia ne’e simples, iha ita-nia fuan no neon sempre hanoin no fó onra ba sira”, Paulo Moniz dehan iha nia diskursu iha serimónia kari ai-funan no sunu-lilin iha semitériu Santa Krús Maliana, ohin.
Nia hatutan joven sira-nia luta iha 12 Novembr 1991, marka pontu virajen iha rekoñesimentu globál ba sofrimentu povu Timór durante invazaun Indonézia.
“Karik foin-msa’e sira la halo reasaun iha tempu ne’ebá, mundu sei la hatene kona-ba luta Timor-Leste nian. Tanba ne’e, ami agradese ba sira m1nia sakrifísiu ne’ebé loke dalan ba independénsia”, nia hato’o.
Rprezentante juventude 12 Novembru, Júlio Carvalho Caero, hatutan katak komemorasaun ne’e la’ós de’it atu hanoin hikas pasadu, maibé mós momentu ida atu hafoun ema nia rezolusaun koletiva atu harii nasaun ho espíritu unidade.
Mate restu 12 Novembru no atuál Sekretáriu Autoridade Munisipál ba Asuntu Sosiál ne’e mós hato’o mensajen ba jerasaun foun sira atu kontinua espíritu luta no uza liberdade ho hanoin neʼebé pozitivu.
“Momentu kuandu ami hakilar, ko’alia kona-ba direitu no lia-loos, oportunidade di’ak ba imi, tanba buat sira ne’ me ami halo liu ona, ami la sura fali ami-nia kolen, ami la husu fali saida mak ami halo, ami hetan tiha ona buat sira ne’e, aagradese tanba ho 12 Novembru halo nakdoko mundu, ohin loron ami entrega ba imi-sira jerasaun foun. Lalika uza oportunidade ne’e ba buat ne’ebé la di’ak, Timór ukun-an tanba ema oferese nia ruin no raan. Bainhira tempu imi-nia ba ukun-an lidera ho boa-votande, kuidadu, atensaun”, nia sujere.
Serimónia komemorasaun ne’e hala’o ho solene no hetan partisipasaun husi reprezentante governu lokál, lideransa komunitária, juventude, no família vítima trajédia Santa Krús.
Notisia relevante:
Jornalista: Sérgio da Cruz
Editóra: Maria Auxiliadora
