BAUKAU, 12 Novembru 2025 (TATOLI)–Prezidente Autoridade Munisipál Baukau, Veneranda Eurico Lemos Martins konsidera selebrasaun Masakre Santa Krúz ba da-34 atu motiva juventude partisipa iha prosesu dezenvolvimentu.
Veneranda Lemos esplika juventude iha tempu rezisténsia maioria iha espíritu brani hodi fó-aan ba mate tanba hakarak liberta Timor-Leste husi okupasaun.
“Ohin ita kontinua sira-nia luta. Hanesan joven, ita reafirma ita-nia konviksaun katak ukun tenke kontinua sira-nia mehi ‘mate ka moris ba dezenvolvimentu’. Ohin ita ko’alia ho sira-nia espíritu hakilar mate ka moris ba dezenvolvimentu,” nia hateten iha Igreja Katedrál, Vila Antiga, Baukau, Kuarta ne’e.
Eis deputada iha Parlamentu Nasionál (PN) ne’e enkoraja Baukau-oan liuliu juventude ne’ebé futuru sai susesór ba juventude loriku asu’ain tenke lolo liman ba malu hodi kria pás no estabilidade nune’e kontribui ba dezenvolvementu iha Baukau.
Entretantu, selebrasaun Masakre 12 Novembru ba dala-34 no komemorasaun Loron Nasionál Juventude ba da-20 iha Baukau realiza ho atividade hanesan limpeza jerál, semináriu, misa, marsa ba pás, kari ai-funan iha simitériu no animasaun ne’ebé hetan apoia orsamentu husi Ministériu Juventude, Desportu, Arte no Kultura ho totál rihun $5.
Jornalista: Natalino Belo
Editór: Xisto Freitas da Piedade
