DILI, 25 Novembru 2025 (TATOLI)–Sekretaria Estadu Komunikasaun Sosiál (SEKOMS) liuhusi Diresaun Nasionál Formasaun Téknika iha Komunikasaun (DNFTC, sigla portugés) hala’o serimónia atribuisaun sertifikadu ba formadu na’in-166 ne’ebé konklui ona formasaun iha tinan 2025.
Serimónia ne’e realiza ho tema: “Hakbiit abilidade profisionál asegura efetividade institusionál.”
Formadu na’in-166 ne’ebé durante ne’e tuir formasaun iha DNFTC mak hanesan Unidade Formasaun Komunikasaun Lian Tetun Jornalizmu, Multimídia, Rádiu, Televizaun, Komunikasaun Relasaun Públika no Servisu Protokolu, Hakerek Imprensa no Unidade Formasaun Jestaun Komunikasaun iha Situasaun Krize.
Aleinde ne’e, Governu liuhusi SEKOMS selebra akordu parseira ho Instituto Camões hodi fó formasaun lian portugés ba profisionál komunikasaun sosiál sira iha Timor-Leste, ne’ebé sei implementa husi Consultório de Língua Para Jornalistas (CLJ).
Totál formadu iha tinan 2025 hamutuk ema na’in-166, kompostu husi mane 79 no feto 87, ne’ebé husi númeru ne’e, funsionariu publiku 110, jornalista ida no estudante finalista universitáriu 55.
Totál formadu hirak ne’e, ba formasaun nível nasionál husi unidade formasaun Komunikasaun Relasaun Públika no Servisu Protokolu iha ema na’in-33, Multimídia 26, Hakerek Imprensa 30, Televizaun 19, Lian Tetun Jornalizmu 24, Rádiu 11 no Unidade Jestaun Komunikasaun iha Situasaun Krize iha ema na’in-23.
Notísia relevante : Institutu Camões ho SEKOMS atribui sertifikadu ba profisionál komunikasaun na’in-71
Diretór Nasional Formasaun Téknika iha Komunikasaun Julio Marques hateten, formasaun ne’e ho objetivu atu formadu sira bele hetan kapasidade di’ak tuir área formasaun hitu ne’ebé define ona
“Tanba ne’e, husi diresaun ne’e atu fó formasaun hodi kapasita ita-boot sira hodi hasa’e ita-boot sira-nia abilidade,” Julio Marques hateten iha nia intervensaun iha ámbitu serimónia atribuisaun sertifikadu ba formadu na’in-166, ne’ebé hala’o iha salaun Ministériu Transporte no Komunikasaun, Tersa ne’e.
Nia promete, DNFTC iha tinan oin sei habelar formasaun iha territóriu nasionál.
Iha fatin hanesan, Reprezentante Diretora Institutu Nasionál Dezenvolvimentu Mao-de-Obra, Institutu Públiku (INDOMO I.P) Lidvia Teresa Tilman informa, kapasitasaun ba estudante finalista universitáriu no ajente administrasaun públika ne’ebé SEKOMS halo liuhusi DNFTC ne’e importante atu haree no asegura katak dezenvolvimentu pesoál hodi hasa’e kualidade produtu iha SEKOMS ne’e hanesan lisan importante hodi funsionáriu sira bele hala’o serbisu ho dignu.
Nia dehan, INDIMO nu’udar institisaun ne’ebé lei fó kompeténsi hodi tau-matan ba kualidade formasaun no ba oin sei koopera ho SEKOMS.
Koñesimentu no abilidade oioin
Reprezentante Formadu husi Unidade Multimídia, Queirico Ronaldo hateten, hafoin partisipa iha formasaun durante fulan-haat, nia parte hetan koñesimentu no abilidade oioin no kompeténsia hodi kompreende no aplika téknika oioin iha área relevante hodi dezenvolve kompeténsia iha área teknolojia informasaun nian.
Aleinde ne’e, formasaun ne’e mós mellora tan koñesimentu, abilidade, no domina tékniku báziku.
“Koñesimentu ne’ebé ami hetan durante tuir formasaun bele apoia tan ami iha nesesidade serbisu nian, aumenta produtividade, no fó kontribuisaun ba hirak ne’ebé relevante ba dezenvolvimentu teknolojia,” nia katak.
Nune’e, Queirico Ronaldo husu ba DNFTC atu hametin kolaborasaun ho instituisaun relevante sira no indústria kreativu hodi bele mellora di’ak liután sustentabilidade programa formasaun sira liuhusi utilizasaun rede profisionál sira, asesu ba teknolojia no oportunidade sira dezenvolvimentu kompeténsia nian ne’ebé luan liu ba partisipante sira.
“Lori kolega hotu nia naran, ami hanesan partisipante iha formasaun ne’e, ami hato’o ami-nia gratidaun no apresiasaun kle’an ba instrutór ka formadór no formadora sira no organizadór formasaun sira hotu ne’ebé fornese orientasaun, koñesimentu, no esperiénsia ne’ebé folin-tebes ba ami,” nia katak.
Nune’e mós, Prezidente Komisaun Funsaun Públika, Agostinho Letêncio de Deus hateten, formasaun no sertifikasaun ne’e importante iha administrasaun públika.
“Sertifikasaun ne’e la’ós suratahan de’it maibé ida-ne’e bele ba ita-nia karreira tomak. Tanba ne’e, Komisaun Funsaun Públika hato’o agradesimentu ba sua exelénsia Sekretáriu Estadu ne’ebé fó ona oportunidade ba ita-boot sira tuir formasaun ne’e. Formasaun ne’e bele lori espetativa rua ba ita-boot sira ida lori kualifikasaun pesoál hatudu ba públiku, katak ita-boot sira mós merese duni sai jornalista no uza mós sertifikasaun ida-ne’e ba ita-boot nia karreira,” nia reforsa.
Sekretáriu Estadu Komunikasaun Sosiál, Expedito Dias Ximenes, iha ámbitu ne’e parabeniza formadu 166 ne’ebé tuir ona formasaun iha unidade hitu.
“Husu ba formadu sira tenke implementa iha ita-boot sira-nia serbisu fatin idaidak ba abilidade no koñesimentu ne’ebé durante fulan-haat imi hetan iha formasaun. Importante tebes hanesan iha unidade hakerek ba imprensa no tetum jornalístiku nia ko’alia ho hakerek la hanesan, ho formasaun ne’e bele komprende saida mak kona-ba hakerek ba imprensa no tetum jornalístiku,” nia tenik.
Jornalista : Natalino Costa
Editora : Julia Chatarina
