DILI, 26 Novembru 2025 (TATOLI)—Governu liuhusi Ministru Administrasaun Estatál, Tomás do Rosário Cabral hamutuk ho Reprezentante Delegasaun Uniaun Europeia iha Dili, Embaixadór Thorsten argfrede, Autoridade Munisipál Dili no korpu diplomátiku sira, Kuarta ne’e, inaugura ona Jardín Memoriál Masakre Santa Krús, iha ámbitu projetu “Parseria ba Fortalesimentu Governasaun Urbana, Inkluzaun, Promosaun Empreendedorizmu Sosiál, iha Timor-Leste”.
Ministru Tomás Cabral informa katak jardín ida-ne’e importante liubá memória istórika ba futuru.
Projetu ne’e, nia esplika, finansia husi Uniaun Europeia ho totál orsamentu $297.817,60 no projetu referidu aprezentadu ikus nian iha espasu públiku redezenvolvidu iha kapitál, ne’ebé iha espasu verde, área ba ema la’o ain, iluminasaun, sintina públika, memoriál no sentru interpretasaun ida iha-ne’ebé ema bele fó omenajen no hanoin hikas Masakre Santa Krús, ne’ebé akontese iha 12 Novembru 1991.
Durasaun husi projetu referidu durante fulan 42 ne’ebé hahú husi 01 Maiu 2022 to’o 30 Novembru 2025.
Governante ne’e informa implementasaun husi projetu ne’e maihusi parseiru oinoin hanesan Autoridade Munisípiu Dili (AMD), UCCLA (União das Cidades Capitais de Língua Portuguesa) no Konsellu Sidade Lisboa (CML-sigla portugeza), iha-ne’ebé Ministériu Administrasaun Estatál (MAE) mak halo fiskalizasaun ba projetu ne’e.
Tuir ministru katak projetu sira-ne’e sai indikadór ida husi avaliasaun kondisaun mínima, husi prestasaun servisu ba autoridade munisipál tanba la kle’ur tan sei hala’o avaliasaun ida kona-ba kondisaun mínima sira no bazeia ba rezolusaun Governu nian katak iha 2027 sei hala’o eleisaun munisipál dahuluk.
Iha fatin hanesan, Sekretária Jerál Adjunta UCCLA, Embaixadora Paula Leal da Silva, hateten UCCLA nu’udár uniaun ida hosi sidade sira iha mundu tomak ne’ebé ko’alia Portugés no fahe valór, kultura, istória no perspetiva ba futuru bazeia ba tulun malu no solidariedade resíproka.
“Hein katak ho ita serbisu ona iha parseria ida-ne’ebé fó fuan no komprometidu, hodi futuru projetu ne’ebé efisiente no multilaterál. Ita sei la alkansa ida-ne’e, klaru, lahó ko-finansiamentu hosi Uniaun Europeia no ita sei la alkansa ida-ne’e lahó tulun folin-laek hosi autoridade timoroan sira, tantu Estadu no munisípiu, partikularmente Ministru Administrasaun Estatál, tanba ita-boot nia apoiu no determinasaun esensiál ba projetu ida-ne’e atu sai realidade,” nia dehan.
Nia hatutan ida-ne’e hanesan onra boot ida ba UCCLA nu’udár instituisaun ida atubele koordena projetu ida-ne’e iha tinan ida ho balun liubá.
“Ha’u tenke hato’o ha’u-nia agradesimentu ba ha’u-nia antesesór, enjeñeiru Ferreira de Almeida, ne’ebé konsege finaliza projetu ida-ne’e,” embaixadora haktuir.
Eventu ne’e partisipa husi ofisiál Governu sira seluk, membru Parlamentu Nasionál, Chargé D’Affairs husi Delegasaun Uniaun Europeia iha Dili, Duarte Bué Alves, Embaixadora Portugál iha Dili, Paula Leal Dailva, Sekretária Adjunta UCCLA, membru Komite 12 Novembru, reprezentante sira korpu diplomátiku no mós konvidadu sira seluk.
Jornalista: Osória Marques
Editór: Xisto Freitas da Piedade
