BOBONARU, 26 Novembru 2025 (TATOLI) – Fundu Nasaun Unida ba Labarik (UNICEF) iha Timor-Leste kompromete atu apoia Governu hodi hametin protesaun no hadi’a moris di’ak labarik sira-nian, iha ámbitu komemorasaun Loron Mundiál Labarik nian.
Reprezentante UNICEF, Teija Vallandingham, dehan Loron Universál Labarik nian ne’e komemora hodi marka asinatura Konvensaun ONU nian iha tinan 1989 kona-ba Direitu sira Labarik nian, tratadu internasionál ida ne’ebé afirma direitu sivíl, polítiku, ekonómiku, sosiál, saúde no kulturál labarik idaidak nian.
Tinan ida-ne’e, tema globál “Ha’u nia Loron, Ha’u nia Direitu sira” no tema nasionál “Ita-nia direitu ba ambiente ida ne’ebé akollidu, dignu, no inkluzivu” subliña importánsia husi ambiente ida ne’ebé apoia labarik sira-nia kreximentu no dignidade.
Nia hatete katak maski labarik sira maka fuan ba futuru nasaun nian, maibé barak maka hasoru nafatin dezafiu sira ne’ebé maka’as hanesan má nutrisaun, stunting, mortalidade neonatál, pobreza, no impaktu sira husi mudansa klimátika.
Notísia relevante: Governu reafirma kompromisu ba protesaun no hakonu direitu ba labarik
“Labarik idaidak lakon tanba kauza sira ne’ebé bele prevene, labarik idaidak ne’ebé toba ho hamlaha, labarik idaidak ne’ebé husik eskola tanba inundasaun ka rai-maran maka apelu urjente ida ba asaun ba ita hotu”, nia hatete iha Jináziu Maliana, ohin.
Governu Timor-Leste, liuhusi prezensa Vise-Primeiru-Ministru no líder nasionál sira seluk hatetne katak hatudu ona kompromisu maka’as hodi rezolve kestaun sira-ne’e.
Tanba ne’e, UNICEF kontinua kolabora ho Governu hodi hamenus stunting, hadi’a kualidade kuidadu neonatál, habelar asesu ba edukasaun ho kualidade, hametin protesaun sosiál ba família ki’ak sira, no harii reziliénsia hasoru mudansa klimátika.
Aleinde ne’e, Vallandingham subliña importánsia atu rona labarik sira-nia lian. “Sira-nia lian importante. Sira-nia ideia sira bele orienta ita ba solusaun sira ne’ebé inkluziva no sustentavel”, nia hatete.
Hodi konklui ninia mensajen ne’ebé konvida parte hotu-hotu atu serbisu hamutuk hodi harii Timor-Leste ida ne’ebé garante katak labarik idaidak saudavel, edukadu, hetan protesaun, no rona sira-nia lian.
“Ida-ne’e maka ita-boot nia loron, ida-ne’e maka ita-boot nia direitu. Ami iha ne’e atu apoia ita-boot”, nia subliña
Notísia relevante: Projetu Portugés iha Bairru komemora Loron Mundiál Labarik
Jornalista: Sergio da Cruz
Editora: Maria Auxiliadora
