DILI, 27 Novembru 2025 (TATOLI)–Koordenadór Isár Bandeira Nasionál, Januario Magalhães, informa korpu isár bandeira ba Loron Proklamasaun Independénsia RDTL ba da-50 ne’e preparadu no hein ezekuta.
“Korpu isár bandeira preparadu. Iha prosesu isár bandeira ne’e ema na’in-77 inklui ho maluk ho nesesidade espesiál na’in-rua, feto ida no mane ida ne’ebé maihosi Munisípiu Aileu. Feto ne’e estuda iha Universidade Nasionál Timor Lorosa’e (UNTL), mana ne’e la eskola,” Koordenadór dehan ba TATOLI, iha resintu Palásiu Governu, Dili, Kinta ne’e.
Responsavel hatutan, sira na’in-77 ne’e reprezenta tinan 1975. Normalmente na’in-75 maibé tinan ne’e Governu planu aumenta tan ema ho nesesidade espesiál na’in rua.
Januario hatutan iha isár bandeira ne’e, iha grupu tolu (3). Grupu dahuluk ema hamutuk 28. Ida-ne’e refere ba loron 28. Grupu parte klaran sira hamutuk 11. Ne’e refere ba fulan-Novembru. Grupu ikus ne’e ema na’in-75. Ne’e refere ba tinan.
Ekipa isár bandeira maihusi Eskola Sekundária São Pedro, Eskola Amigo de Jesus, Eskola Sekundária 04 Setembru UNAMET Balide, Eslola 05 de Maio, Eskola Sekundária Jerál 10 Dezembru Komoro, Eskola São José Operáriu inklui eskola iha Hera no Metinaru.
“Ita halo preparasaun ba isár bandeira durante semana rua, hahú iha 14 Novembru to’o horisehik. Ekipa ida-ne’e tuan, isár bandeira iha 20 Maiu liubá nian mak ami bolu mai. Entaun, semana rua ne’e sufisiente ona ba ami,” nia akresenta.
Magalhaes tenik formasaun ba ekipa isár bandeira ne’e maihosi ekipa hosi F-FDTL hamutuk na’in-sanulu (10) ho kapitaun ida (1) no mós PNTL ne’e ho asistente no kapitaun ida.
“Ita-nia maluk ho nesesidade espesiál na’in-rua ne’e nia kna’ar mak hein bandeira iha podium no fó bandeira ba inspetór isár bandeira,” nia konklui.
Jornalista: Osória Marques
Editór: Xisto Freitas da Piedade
