DILI 28 Novembru 2025 (TATOLI)–Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Calisto dos Santos ‘Coli Coliati’ konvida Timoroan hotu iha Tinan 50 Proklamasaun independénsia atu hametin espíritu nasionalizmu no patriotízmu hodi hadomi rai Timor.
“Ha’u apela ba tinan 50 ita-nia Independénsia nu’udar faze konstrusaun Estadu, husi Timoroan hotu tenke iha espíritu nasionalizmu no patriotízmu hadomi rai, povu, no istória ne’ebé lori ita mai ohin no prepara ita ne’ebé nakonu ho espetativa ou esperansa ka futuru ida-ne’ebé naroman tebes,” Jenerál Coliati hateten ba jornalista sira hafoin partisipa kemorasaun Proklamasaun Independénsia unilaterál 1975 ba dala-50, ne’ebé hala’o iha Palásiu Governu, Sesta ne’e.
Notísia relevante : Sobrevivente 12 Novembru no veterana nia lian ba tinan 50 Proklamasaun Independénsia RDTL
Nia observa, durante ne’e dezenvolvimentu Timor-Leste la’o maka’as no hatudu pontu signifikativu. Maibé nia husu progresu labele iha Dili laran de’it, tenke to’o foho sira.
“Ami militár ne’e iha foho mota kuak ami la’o hotu, ne’ebé bainhira ko’alia kona-ba oinsá mak atubele haree, oinsá mak bele halo sasukat ida ba ita-nia dezenvolvimentu, ami militár hateten dehan katak 50 anos, 20 itál anos pos kontrusaun Timor-Leste la’o no la’o bá oin liu tan,” nia tenik.
Mudansa ida ne’ebé nia nota mak serimónia boot sira kapás tebes no kestaun seguransa hakmatek kalan to’o loron.
“Ita-nia povu no joven moris hakmatek, ida-ne’e hatudu katak ita iha progresu boot. Agora ida-ne’ebé mak importante mak tinan 50 tenke kuda ba Timoroan mak idaidak nia espíritu hadomi rai ida-ne’e, labele sukat dezenvolvimentu Timor-Leste hanesan karun laran, dezenvolvimentu Timor ne’e sukat husi Ataúru to’o Jako, labele dalan sira ne’e de’it,” nia katak.
Jenerál Coliati hatutan: “Atu dehan de’it dezenvolvimentu iha Timor ne’e la’o, la toba. Ba ha’u Timor ne’e la’o hela, dezenvolvimentu Timor ne’e halai de’it hanesan militár.”
Jornalista : Natalino Costa
Editora : Julia Chatarina
