DILI 28 Novembru 2025 (TATOLI)–Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’ hateten, tinan 50 loron Proklasaun Independénsia labele sai hanesan selebrasaun de’it, maibé tenke sai momentu ba joven sira oinsá konserva istória sakrifísiu fundadór sira iha loron 28 Novembru 1975.
“Haree ba referénsia pasadu ne’e sai hanesan ezemplu, liuliu sakrifísiu ne’ebé mak ita-nia fundadór Estadu sira halo sai, hanesan dalan ba ita atu konserva ita-nia Independénsia ida-ne’e no mantein ita-nia kredibilidade iha komunidade internasionál, nune’e mós dezenvolve ita-nia rai halo com que povu bele moris hakmatek no moris di’ak,” Klamar Fuik hateten ba Jornalista sira hafoin partisipa kemorasaun tinan 50 Proklamasaun Independénsia unilaterál, ne’ebé hala’o iha resintu Palásiu Governu, Sesta ne’e.
Notísia relevante : Xanana Gusmão hanesan fatuk ne’ebé metin lori TL hetan independénsia
Governante ne’e dehan, ba oin Timor-Leste sei hetan dezafiu barak liután, tanba ne’e husu atu Timoroan hotu tenke hamutuk fó liman ba malu hodi kria pás no unidade nafatin hodi konsentra ba dezenvolvimentu.
“Husu ba Timoroan hotu hamutuk firme hodi hametin unidade,” nia katak.
Ministru Defeza nota, durante ne’e dezenvolvimentu Timor-Leste la’o di’ak no povu goza nia liberdade.
Jornalista : Natalino Costa
Editora : Julia Chatarina
