DILI, 28 Novembru 2025 (TATOLI) – Sekretáriu-jerál Nasaun Unida (ONU) António Guterres, liuhosi ninia porta-vós, hatudu preokupasaun maka’as kona-ba akontesimentu sira foin lalais ne’e iha Guiné-Bissau no kondena maka’as golpe Estadu ne’ebé halo hosi elementu militár sira no tentativa hotu hodi sobu orden konstitusionál iha nasaun Áfrika Osidentál ne’e.
Nia subliña katak desprezu ba vontade hosi povu ne’ebé vota ho dame iha eleisaun sira loron 23 Novembru nian konstitui violasaun ida ne’ebé la aseitavel ba prinsípiu demokrátiku sira.
Sekretáriu-jerál ONU nian apela ba restaurasaun imediata no inkondisionál hosi orden konstitusional no libertasaun hosi funsionáriu sira ne’ebé detidu hotu, hatete hosi porta-vós ONU nian, Stephane Dujarric, liuhusi nota imprensa.
Dujarric hatete katak sekretáriu-jerál ONU nian husu ba parte interesada sira hotu atu ezerse restrisaun másimu, defende instituisaun demokrátiku sira no estadu direitu, no respeita vontade hosi povu Giné-Bissau nian.
Guterres subliña katak disputa sira tenke rezolve liuhosi diálogu pasífiku no inkluzivu no kanál legál sira, no repete apoiu tomak ONU nian ba esforsu sira hosi Komunidade Ekonómika Estadu sira Áfrika Osidentál nian (CEDEAO, sigla portugés), Uniaun Afrikan nian, hodi salvaguarda demokrasia, promove estabilidade, no ajuda konkluzaun ho dame no fila lalais ba ninia dalan demokrátiku, porta-voz ne’e hateten.
Iha loron-kuarta (26 novembru), forsa armada sira Guiné-Bissau nian fó sai iha televizaun nasionál katak kaer ona kontrolu tomak ba podér Estadu nian hodi hatán ba saida maka sira hanaran tentativa sira hosi figura polítiku balun hodi destabiliza nasaun.
Iha loron-kinta ne’e, ofisiál superiór militár nian, Horta Inta-A, simu pose nu’udar prezidente tranzisaun Giné-Bissau nian ba mandatu tinan ida.
Notísia relevante: Ilídio Vieira nomeadu nu’udar Primeiru-Ministru Giné-Bisau
Fonte: Xinhua
