DILI, 28 Novembru 2025 (TATOLI)–Iha selebrasaun Loron Proklamasaun Independénsia RDTL ba da-50 (28 Novembru 1975-28 Novembru 2025), sobrevivente 12 Novembru (12N) no veterana husu líder istóriku sira fó liman ba-malu hodi hamutuk dezenvolve nasaun ida-ne’e.
Sobrevivente 12 Novembru, Dulce Ximenes Guterres katak ohin tinan 50 Proklamasaun Independénsia ne’e atu lembra filafali sofrimentu ne’ebé Timor-Leste enfrenta, nune’e hosi ohin bá-oin ne’e kria unidade, pás ba rai ida-ne’e.
Ita haree pasadu tinan 50 ba kotuk, bainhira ita seidauk ukun-aan sente sofre tebes. Entaun, iha ukun aan ida-ne’e, iha tinan 50 ne’e sente orgullu tanba hetan ona liberdade. Ita sente ona dezenvolvimentu tanba daudaun ne’e Governu hahú halo konstrusaun estrada no infraestutura bázika mós balun la’o ona iha nasionál no iha munisípiu to’o área rurál.
Ha’u rekomenda ba PM Kay Rala Xanana Gusmão no líder sira seluk atu fó liman ba malu atu iha futuru lori nasaun ida-ne’e ba dezenvolvimentu.
Aleinde ne’e, Veterana Maria Rosa da Câmara “Bisoi”, hateten maski Proklamasaun Independénsia la’o tinan 50 ona maibé ita-nia dezenvolvimentu ne’e seidauk la’o másimu no sei la’o tuir nia tempu ne’ebé determina ona.
Ita haree katak Governu hahú halo dezenvolvimentu husi nasionál to’o área rurál, nune’e komunidade bele sente benefísiu husi independénsia.
Kestaun ida-ne’e ita hotu nia kontribuisaun tantu povu ki’ik no matenek-na’in nune’e bele aselera ita-nia prosesu dezenvolvimentu.
Setór sira-ne’ebé mak hala’o ita husu atu iha kontinuidade. Governu ida nia mandatu bainhira hotu ona, ida foun mai fali tenke kontinua atu atinje meta dezenvolvimentu.
Ha’u husu ba ministériu liuliu Governu atubele implementa programa tinan lima (5) nian ne’ebé aprova iha Parlamentu Nasionál ho osan ne’ebé mak tinan-tinan aloka ba iha ministériu idak-idak atubele implementa di’ak iha baze.
Husu mós ba ministru sira atubele hakbesik ba povu hodibele identifika povu ninia difikuldade no saida mak durante ne’e povu hasoru iha terrenu liuliu kona-ba infraestrutura no setór seluk ne’ebé mak importante ba povu iha baze.
Nune’e mós, Sobrevivente 12 Novembru, Graciana Pereira apresia ba Governu ne’ebé halo dezenvolvimentu maibé presiza hadi’a setór importante sira. Ita povu prontu atu servisu ho Estadu, koopera ho Governu atu halo dezenvolvimentu. Tanba ita tama ona ba iha tinan 50 Proklamasaun Independénsia Governu presiza tane juventude para sira bele hamutuk hodi servi nasaun.
Ba juventude presiza unidade, respeita malu. Atu halo dezenvolvimentu presiza juventude ne’ebé matenek eintermu hosi karakter, kualidade no koñesimentu. Ho ida-ne’e husu Governu atu labele haruka joven barak bá rai-li’ur tanba Timor presiza tekursu atu kontribui ba dezenvolvimentu iha rai-laran.
Se bele loke kampu traballu barak iha ita-nia rai nune’e bele akumula joven sira bele servisu. Governu mós tenke dignifika veteranu sira tanba sira mak ikus nasaun hetan ukun-aan.
Jornalista: Osória Marques
Editór: Xisto Freitas da Piedade
