DILI, 30 Novembru 2025 (TATOLI)—Ministru Juventude, Desportu, Arte no Kultura (MJDAK), Nelyo Isaac Sarmento, sábadu ne’e, halo abertura ona ba Kampionatu Nasionál Basketból MJDAK Cup no Taekwondo Junior Championship 2025.
“Ida-ne’e hanesan espasu ida atu selesiona atleta Basketból ba futuru, inklui klubu sira atu prepara-an di’ak liután hodi partisipa iha liga basketball ba kategoria feto no mane ne’ebe sei realiza iha 2026,” Nelyo Isaac Sarmento hateten ba jornalista sira iha Ginájiu, Dili.
Objetivu husi torrneu referidu ne’e oinsá atu fanu federasaun sira hodi servisu hamutuk ho Governu atu organiza atividade desportu sira liuliu modalidade Basketból.
Ministru Isaac esplika, torrneu referidu la’ós basketeball de’it maibé iha mós atividade taekwondo junior championship 2025,
“Tanba husi imi juniór mak ita bele hetan atleta ne’ebé di’ak, hodi ba partisipa iha Sea Game no mos Asean Games,” nia dehan.
Nia dehan, hakarak uza oportunidade ida-ne’e hodi organiza atividade taekwondo atu bele dezenvolve taekwondo iha Timor-Leste, nune’e tinan oin sei iha kampiunatu taekwondo no mós atividade seluk tan maibé depende ba federasaun ida-idak,
Governante ne’e hatetem, kona-ba prémiu, MJDAK sei prepara orsamentu, atu fasilita kampiaun sira nune’e ba tinan oin, sira bele prepara jogadór sira atu partisipa iha liga basketball no taekwondo open.
Iha fatin hanesan, Atleta Basketból husi Klubu Ai-Leba one shoot, Nelia Bosco, hato’o agradesementu ba MJDAK ne’ebe loke ona kampionatu basketball no rekomenda ba Governu atu lebele kria eventu iha nasionál de’it maibé bele loke mós eventu ne’e iha munisípiu sira.
“Iha oportunidade ne’e ha’u hakarak rekomenda ba Governu liuliu MJDAK, atu labele loke eventu iha nasionál de’it maibé bele loke torrneu sira hanesan ne’e ba munisípiu sira, hodi identifika atleta sira-ne’ebé iha talentu,” nia sujere.
Enkuantu torrneu referidu partisipa husi klubu basketball hamutuk sia (9) no taekwondo partisipa husi dajon 12 husi Dili no mós munisípiu sira.
Jornalista : Osória Marques
Editór : Cancio Ximenes
