DILI, 01 Dezembru 2025 (TATOLI)–Dosente Universidade Nasionál Timor Lorosa’e (UNTL), Joel Manuel Soares, informa empreendedorizmu mak negósiu inovativu ne’ebé motiva estudante sira no hametin empreendedorizmu hanesan xave estratéjiku atu hakbiit juventude.
“Ida-ne’e hanesan kritériu ba estudante UNTL sira. Seluk fali estudante bele aprende aleinde teoria, iha pratika empreendedorizmu liuhosi autór empreendedór timoroan sira-ne’ebé influénsia iha rai-li’ur ne’ebé mak halo negósiu ho susesu ona,” nia dehan ba jornalista sira iha Sentru Kultura Indonézia, Kaikoli, Dili, Segunda ne’e.
Nia hatutan, liuhosi semináriu ida-ne’e bele enkoraja no motiva estudante oinsá mak sai kriativu iha área negósiu nian.
“Iha-ne’e ita-nia oradór na’in-rua ne’ebé prezensa iha-ne’e ona. Oradór ida mak halo atividade agrikultura nian iha Maliana. Lori tópiku kona-ba difikuldade, dezafiu no opurtunidade iha era dijitál nian oinsá mak empreendedór sira bele hasoru. No oradór daruak mak foinsa’e empreendedór ne’ebé halo negósiu iha área teknolojia (Telemor), ne’ebé ko’alia kona-ba oinsá mak motiva joven sira bele envolve aan iha empreededorizmu nian,” nia dehan.
Iha semináriu ne’e, estudante hamutuk 120 hosi Departamentu Siénsia Ekonomia, Fakuldade Ekonomia no Jestaun Universidade Nasionál Timor Lorosa’e (UNTL) mak partisipa iha semináriu ne’e.
Estudante UNTL, Michelle Edonia Correia da Costa, dehan ohin aprezenta proposta kona-ba negósiu Clay art ba maluk estudante sira. Ida-ne’e hanesan motiva estudante sira oinsá bele halo negósiu ida.
“Sai hanesan fatin kreitividade ida hodi halo negósiu Clay art nune’e bá-oin ho susesu liután hodi inspira no fó fali arte ne’ebé kualidade di’ak ba komunidade,” nia dehan.
Edonia hatutan, kria produtu arte ne’ebé úniku, prodús Clay Art ne’ebé kriativu, inovativu no kualidade hodi hametin kriatividade, fó fatin no fasilidade ne’ebé suporta no halo dezenvolvimentu kriativu ba komunidade.
“Ida-ne’e suporta dezenvolvimentu lokál uza matéria prima lokál ba iha dezenvolvimentu negósiu nian no fó esperiénsia di’ak, fó servisu ne’ebé amizade, profisionalizmu no responsavel,” nia tenik.
Jornalista: Osória Marques
Editór: Xisto Freitas da Peidade
