DILI, 01 Dezembru 2025 (TATOLI)—Diretór Ezekutivu Fundu Dezenvolvimentu Kapitál Umanu (FDCH-sigla portugeza), Júlio Aparício, informa FDCH kontinua prioriza programa bolsu estudu iha tinan 2026.
“Governu prioridade maka’as ba dezenvolvimentu rekursu umanu iha área estratéjiku, ho nune’e iha programa FDCH iha tinan oin sei kontinua oferese bolsa estudu ba públiku einjerál, bolsa estudu ba dosente hosi universidade privada no funsionáriu publiku sira-ne’ebé sei bazeia ba sistema méritu. Implementasaun programa bolsa estudu sei organiza direta husi Sekretariadu FDCH ho liña ministeriál no instituisaun Estadu akreditadu sira,” nia dehan ba TATOLI iha nia kna’ar fatin, Kolmera, Dili, Segunda ne’e.
Tuir programa, iha 2026, FDCH sei finansia atividade 27 husi programa rua (2) hanesan Programa Bolsa Estudu ho totál orsamentu $18.771.722 ne’ebé sei finansia atividade rua-nulu resin-lima (25) ho benefisiáriu 5.919 no Programa Funsionamentu nо Dezenvolvimentu Institusional ho totál orsamentu $1.844.138 ne’ebé sei finansia atividade rua ho benefisiáriu 94.
Orsamentu Jerál Estadu tinan 2026 ba Fundu Dezenvolvimento Kapitál Umanu ne’e hamutuk $20.615.860. Ida-ne’e ba kategoria Saláriu no Vensimentu $ 1.036.236, Bens no servisu $1.257.902 no Transferénsia Públika $18.321.722. Iha verba Transferénsia Públika ho montante $1.182,400 ba fali Bens no Servisu hodi sosa billete aviaun ba bolseiru foun sira iha 2026, nune’e bele fasilita bolseiru sira-nia viajen ba rai-li’ur.
Jornalista: Osória Marques
Editór: Xisto Freitas da Piedade
