DILI, 01 Dezembru 2025 (TATOLI)—Sekretaria Estadu ba Igualdade ho Ministériu Ensinu Superiór Siénsia no Kultura (MESSK) ho parseiru United Nations Population Fund (UNFPA), Segunda ne’e, realiza Semináriu Nasionál kona-ba Integrasaun Prevensaun no Resposta ba Violensia Bazeia ba Jéneru (VBJ) iha Kurríkulu Universidade.
Ministru Ensinu Superiór Siénsia no Kultura, José Honório da Costa Pereira Jerónimo, hateten semináriu ne’e ko’alia kona-ba oinsá mak bele hatama kurríkulu padraun nasionál atu hanorin iha ensinu superiór sira.
“Orsida sei iha aprezentadora sira atu hato’o opiniaun sira tanba matéria ne’e tuir UNFPA katak violénsia bazeia ba jéneru iha, tanba ne’e mak importante tebes tama iha kurríkulu padraun nasionál nune’e bele hanorin ba ensinu superiór sira,” Ministru dehan ba jornalista sira iha Otél Timor, Kolmera, Dili.
Nia tenik sosiedade ohin loron ladún tau importánsia atu respeita feto sira liliu iha kampus ne’e no husu ba estudante sira bainhira hasoru violénsia tenke brani atu ko’alia ba dirijente sira.
Iha fatin hanesan, Sekretária Estadu ba Igualdade, Elvina Sousa Carvalho, informa atividade ohin ne’e nu’udár konsulta ida para hetan kompromisu husi universidade sira no mós ensinu superiór kona-ba oinsá atu integra violénsia bezeia ba jéneru iha kurríkulu edukasaun.
“Ne’ebé ha’u hanoin ida-ne’e nu’udár momentu ida importante tebes atu iha diskusaun nune’e bele hetan kompromisu seriedade husi ensinu superiór sira. Tanba ita-boot sira mós hatene daudaun sai hanesan problema ne’ebe alarmante boot ba iha universitáriu sira ka estabelesimentu ensinu superiór sira-ne’ebé mak la sees mós husi violénsia bazeia no mós asédiu sexuál. Ida-ne’e la’ós iha universidade de’it maibé iha universidade ida-rua ka tolu ne’ebé mak iha kazu asédiu sexuál,” Sekretária Estadu dehan.
Tuir nia katak VBJ sai nafatin dezafiu ida-ne’ebé krítiku ba saúde públika, direitu umanu no dezenvolvimentu ho impaktu ne’ebé bele akontese ba tempu naruk ba ema idak-idak, família sira no komunidade. Universidade sira mak hanesan sentru aprendizajen, formasaun koñesimentu, lideransa no transformasaun sosiál iha responsabilidade úniku hodi forma líder no profisionál sira iha futuru ho kompeténsia sira atu hatán ba VBJ.
Ministériu Ensinu Superiór Timor-Leste rekoñese urjénsia atu hatama resposta VBJ nian iha programa akadémiku sira hodi aliña ho Objetivu Dezenvolvimentu Sustentavel (ODS 3, 4 no 5), kompromisu nasionál sira kona-ba igualdade jéneru no ajenda kle’an liu kona-ba prevensaun violénsia no justisa sosiál.
Workshop ida-ne’e fornese plataforma estratéjiku ida ba líder akadémiku sira, dekanu no dosente sira atu dezenvolve roteiru ba integrasaun kurríkulu nian no atu halo kompromisu hamutuk ida ba institusionalizasaun ensinu superiór ne’ebé sensivel ba VBJ.
Jornalista: Osória Marques
Editór: Xisto Freitas da Piedade
