DILI, 01 Dezembru 2025 (TATOLI)–Embaixadór Timor-Leste ba Indonézia, Roberto Soares, hateten negósiasaun fronteira terrestre entre Timor-Leste ho Indonézia iha Oekusi sei kontinua resolve ho akordu anteriór ne’ebé Portugál ho Olanda kria ona.
Notísia Relevante: Timor-Leste kontinua aposta akordu Olanda-Portugal iha negosiasaun fronteira terrestre
“Timor-Leste sempre aposta no kaer metin tratadu ne’ebé iha nanis ona entre Portugál no Olanda. Ida-ne’e mak sai hanesan baze fundamentál ne’ebé ita kaer metin iha negosiasaun ita-nian ho Indonézia,” Embaixadór Timor-Leste ba Indonézia, Roberto Soares, hateten ba Agência Tatoli liuhusi programa entrevista eskluziva ne’ebé hala’o iha edifisiu TATOLI, segunda ne’e.
Nia dehan, Timor-Leste nia prinsipiu hodi kaer metin tratadu referidu no apoiu husi lei internasionál atu fó forsa ba Timor-Leste nia luta.
“Ita-nia prinsipiu kaer metin tratadu ida-ne’e, envoka mós lei internasionál hanesan ita-nia forsa. Entaun, ita-nia pronsipiu mak ne’e, luta no defende de’it saida mak lei internasionál haruka no buat ne’ebé partensia ba ita, ita sei la ezije buat ne’ebé la’ós tuir lei internasionál haruka no tuir istoria ne’ebé antes ne’e iha ona,” Embaxadór ne’e dehan.
Nia hatutan, progresu negosiasaun entre fronteira terrestre entre nasaun rua (2) la’o hela no hein prosesu sira tuir mai hodi konklui iha tempu besik.
“Ita fiar katak ho Prezidente Indonézia nian hamutuk ho ita-nia Primeiru-Ministru, Kay Rala Xanana Gusmão, ko’alia didi’ak ba malu ita fiar iha tempu besik bele konklui, fronteira entre nasaun rua (2) nian,” nia dehan.
Entretantu, maiória fronteira terrestre sira rezolve ona maibé iha Oekusi parte Citrana nian to’o ohin loron sei mosu disputa entre Timor-Leste no Indonézia, maibé Estadu nasaun rua (2) ne’e buka hela solusaun atu rezolve no ko’alia didi’ak ho komunidade ne’ebé hela besik área fronteira.
Antes ne’e, fronteira terrestre entre Timor-Leste ho Indonézia iha rejiaun Oekusi halo parte iha liña fronteira ne’ebé hale’u illa Timor.
Fronteira ne’e fahe ba segmentu rua (2), ho segmentu prinsipál iha Illa Timor no segmentu seluk hale’u Oekusi. To’o ohin loron, aspetu oioin husi fronteira ne’e sai nafatin hanesan asuntu husi diskusaun entre nasaun rua ne’e.
Segmentu prinsipál; Segmentu ida-ne’e mak seksaun prinsipál husi liña fronteira iha Illa Timor, ne’ebé haketak maiória rai-boot Timor-Leste husi provínsia Indonézia Nusa Tenggara Timur (NTT).
Segmentu Oekusi: Segmentu daruak mak liña fronteira ne’ebé hale’u esklave Oekusi (ne’ebé lokaliza iha parte oeste Illa Timor nian) no haketak husi territóriu Indonézia.
Diskusaun sira-ne’ebé la’o hela: Maske fronteira terrestre hetan ona delimitasaun formál, detallu balun, hanesan marka fronteira no rezolusaun disputa relasiona ho asuntu sira hanesan disputa Citrana-Naktuka, sai nafatin asuntu diskusaun no koordenasaun entre Timor-Leste no Indonézia.
Notísia Relevante: PN kontinua fó konfiansa ba Xanana luta finaliza fronteira terrestre
Jornalista : Hortencio Sanchez
Editór : Cancio Ximenes
