DILI, 01 Dezembru 2025 (TATOLI)–Ekipa Selesaun Nasionál Futeból Timor-Leste U-17 rekolla pontu neen hafoin manán Srilanka 2-1 iha jogu ikus faze kualifikasaun Grupu A AFC Asian Cup iha Xina.
Ekipa Lafaek susesu rekolla pontu neen iha tabela klasifikasaun Grupu A hafoin antes ne’e manán Brunei Darussalam ho skor 0-2 no iha jogu ikus manán tán Srilanka ho skor 2-1 ne’ebé realiza iha Estádiu Yangchuan, Domingu (30/11/2025).
Iha jogu Timor-Leste kontra Srilanka, parte dahuluk elementu treinadór Manuel Alari da Costa Soares lidera ho skor 1-0 iha minutu 26 ne’ebé enxe husi Elton da Conceição no golu seluk prodús iha parte daruak minutu 63 liuhosi jogadór Zeus Lay.
Enkuantu, Srilanka konsege responde golu ida hodi hamihis tabela skor 2-1 iha minutu estra parte daruak liuhosi jogadór Ishaq no ekipa rua termina jogu ho skor 2-1.
Ho rezultadu jogu, maski ekipa rua falla hakat bá kompetisaun tasa AFC Asian Cup U-17 iha tinan 2027, maibé Timor-Leste konsege hadi’a valór iha tabela klasifikasaun ho pozisaun dahaat, rezultadu manán rua (2) no derrota tolu (3), enkuantu Srilanka iha pozisaun dalimak, rezultadu manán ida (1) no derrora lima (5).
Jornalista: Natalino Belo
Editór: Xisto Freitas da Piedade
