DILI, 01 Dezembru 2025 (TATOLI) –Uniaun Afrikana suspende Guiné-Bissau hafoin golpe militár, hodi hatete katak sei la tolera mudansa inkonstitusionál sira.
Iha rezolusaun ida ne’ebé adota hosi Konsellu Dame no Seguransa UA nian iha loron-sesta, organizasaun ne’e repete katak iha “toleránsia zero ba mudansa inkonstitusionál sira iha governu nian.”
Nia movimenta atu “suspende kedas Repúblika Giné-Bisau hosi partisipasaun iha atividade hotu-hotu Uniaun nian, nia órgaun no instituisaun sira, to’o orden konstitusionál restaura iha nasaun.”
Ko’alia ba The Associated Press iha sábadu kalan, xefe gabinete eis-prezidente Umaro Sissoco Embaló nian hatete katak líder ne’e halo viajen ba Repúblika Kongo iha kalan no to’o iha sábadu dadeersan.
“Sim, prezidente iha ona Brazzaville. Ami sai hosi Dakar horisehik kalan no to’o ona iha Kongo-Brazzaville ohin dadeer,” konfirma hosi Califa Soares Cassamá, xefe Estadu-Maiór eis-prezidente nian ba AP.
Embaló antes ne’e to’o ona iha viziñu Senegál iha loron-kinta ne’e ho voo ida ne’ebé aluga hosi Governu senegalés.
Giné-Bisau, nasaun ida ne’ebé kiak liu iha mundu, hetan golpe no tentativa golpe sira dezde nia independénsia hosi Portugál iha tinan 50 liubá, inklui tentativa golpe Estadu nian iha fulan-Outubru.
Nasaun ho ema millaun 2,2 koñesidu hanesan sentru ida ba tráfiku droga nian entre Amérika Latina no Europa, tendénsia ida ne’ebé maka peritu sira hatete katak hamosu ona nia krize polítika sira.
Iha loron-sábadu, prezidente Repúblika Tranzitóriu, Jenerál Horta Inta-a, nomeia ona Governu foun ida ho membru na’in 28, ne’ebé barak liu hanesan aliadu sira hosi prezidente sesante.
Bloku rejionál Áfrika Osidentál koñesidu ho naran CEDEAO iha loron-kinta ne’e suspende ona Guiné-Bissau hosi nia órgaun sira ne’ebé foti desizaun to’o restaura orden konstitusionál.
Toma pose podér militár iha loron-kuarta ne’e akontese hafoin eleisaun prezidensiál no lejizlativa sira iha loron-domingu.
Prezidente atuál Embaló no kandidatu opozisaun Fernando Dias ida-idak reklama vitória.
Hafoin golpe Estadu, altu komandu militár iha nasaun Áfrika Osidentál fó pose ba eis-xefe Estadu-Maiór ezérsitu Inta-a, hanesan xefe Governu militár, ne’ebé sei fiskaliza períodu tranzisaun tinan ida, tuir deklarasaun ida ne’ebé fó sai iha televizaun estatál.
Notísia relevante: Sekretáriu Jerál ONU kondena golpe Estadu iha Giné-Bisau
Fonte: AP News
