DILI, 02 Dezembru 2025 (TATOLI)–Retiru anuál Ajénsia Notisioza TATOLI, I. P. destaka pontu importante mak Transforma Frakeza ba Forsa hodi Serbí.
Diretór Sentru Retiru Dare, Padre Mariano Maia, ne’ebé lidera retiru ne’e esplika objetivu prinsipál husi reflesaun anúal ne’e atu identifika frakeza pesoál iha kada funsionáriu liuliu rekoñese erru hotu ne’ebé komete ona durante tinan 2025 nune’e bele junta hamutuk sai forsa ne’ebé bele serbí institusaun TATOLI iha tinan 2026.
“Keta moe ho ita-nia frakeza, más rekoñese nu’udár ita-nia forsa. Frakeza no forsa hanesan buat rua ne’ebé presiza malu no kompleta malu katak fraku presiza forte no forte presiza fraku,” Padre Mariano Maia hateten iha Kafé Memoriál Dare, Dili, Tersa ne’e.
Nia aprofunda katak frakeza mak pesóal ka funsionáriu idak-idak iha frazeka hanesan limitadu tempu no espasu.
“Liuhusi frakeza sai lisaun katak nu’udár ema la perfeitu no presiza haraik aan no rekoñese aan limitadu hodi aprende liután hodi hadi’a aan atu hetan kbi’it no apoia husi ema seluk,” Amu esplika.
Mezmu nune’e, tuir nia, liuhusi reflesaun kada pesoál rekoñese frakeza hodi deskobre nu’udár forsa tanba frakeza la’ós obstákulu maibé nu’udár oportunidade hodi loke aan ba ema seluk hodi kompleta malu iha instituisaun TATOLI.
Entretantu, retiru ho tema “Transforma Frakeza ba Forsa hodi Serbi” ne’e organiza husi Conselho Diretivo TATOLI, I.P. no partisipa husi Fiskál Úniku TATOLI, kargu xefia sira, funsionáriu no jornalista sira-ne’ebé hala’o kna’ar iha mídia Estadu ne’e.
Jornalista: Natalino Belo
Editór: Xisto Freitas da Piedade
