DILI, 16 Dezembru 2025 (TATOLI)—Veterana Madalena Bidau Soares kodigu ‘’Kasian’’ daudaun ne’e baixa iha Hospitál Nasionál Guido Valadares tanba moras kardiovaskulár.
Notísia Relevante: Veterana Kasian: “Lori ha’u-nia beik loke eskola ba labarik sira”
“Veterana kasian mai halo tratamentu iha HNGV iha loron 11 Dezembru to’o agora atu ba loron lima ba neen ona. Nia mai diagnosa kardiaka tanba antes ne’e nia ho moras tensaun kle’ur ona, entaun la kontrola no halo nia fuan ne’e bubu,” Médiku Kardiolojista, Sidonio Mesquita, hateten iha nia kna’ar fatin ICCU HNGV, ohin.
Médiku ne’e dehan, antes veterana tama mai baixa HNGV, veterana mós iha infeksaun iha pulmaun, nune’e halo iis boot no halo ain bubu, entaun médiku sira deside tau okjiseniu no kondisaun atual daudaun ne’e estável ona.
“Agora daudaun nia kondisaun di’ak ona no nia ain mós la bubu book an ba mai di’ak ona, signifika iha mudansa ba nia moras ne’ebé mak iha, tanba ita HNGV nafatin fó tratamentu di’ak ba nia,” nia esplika.
Nia informa, ho fasilidade HNGV ne’ebé mak iha sei halo tratamentu ba veterana Kasian to’o rekupera ho di’ak.
“Kona-ba planu transferénsia ba rai-li’ur ne’e laiha, tanba veterana nia moras ne’e ita-nia fasilidade HNGV mós sufisiente atu halo tratamentu ba nia to’o di’ak. Tanba agora mós nia kondsaun iha mudansa ne’ebé mak signifikativu,” nia hateten.
Nia esplika, médiku sira-ne’ebé atende ne’e la’ós parte fuan mesak haree, maibé veterana mós sofre pulmaun, entaun médiku sira husi pulmaun mós mai obesrva nafatin no fó tratamentu liuliu ai-moruk sira.
“Ho tratamentu ne’ebé mak iha tempu badak veterana bele rekupera husi-nia saúde no ita nafatin fó hanoin ba ita-nia veterana ne’e atu nafatin mai kontrola,” nia dehan.
Nia hateten, ai-moruk sira-ne’e sufisiente atu atende ba veterana ne’e, maibé iha item ida mak laiha maibé iha ai-moruk seluk ne’ebé hanesan bele subtitui atu atende ba pasiente ne’e rasik.
Daudaun ne’e pasiente na’in-10 mak baixa hela iha sala ICCU, Hospitál Nasionál Guido Valadares hodi hetan tratamentu husi médiku espesialita kardiaku na’in-ida, médiku jerál na’in-rua (2) inklui ho enfermeiru sira.
Notísia Relevante: Karik Osan Iha, Kasian Prefere Loke Tan Eskola Ho Fasilidade Adekuada
Jornalista : Felicidade Ximenes
Editór : Cancio Ximenes
