DILI, 04 Marsu 2026 (TATOLI)—Governu liuhusi reuniaun Konsellu Ministru, kuarta ne’’e, halo analiza relatóriu enkuadramentu legál no funsionamentu institusionál Rejiaun Administrativa Espesiál Oekusi Ambenu (RAEOA), ne’ebé aprezenta husi komisaun ne’ebé servisu iha (RAEΟΑ).
Tuir komunikadu ne’ebé Agência Tatoli asesu iha portál Governu haktuir, misaun ne’ebé hala’o entre loron 22 to’o 26 Fevereiru 2026, ho objetivu atu avalia enkuadramentu legál no funsionamentu institusionál RAEOA nian, nomós atu klarifika prosedimentu ne’ebé relasiona ho jestaun administrativa, finanseira no rekursu umanu iha rejiaun ne’e.
Ekipa ne’e inklui reprezentante sira husi Governu no instituisaun oioin Estadu nian, inklui membru husi Ministériu Obra Públika, Ministériu Finansa, Komisaun Funsaun Públika no servisu tékniku relevante sira.
Durante aprezentasaun, analiza lejizlasaun ne’ebé aplikavel ba RAEOA nomós regulamentu sira kona-ba ezekusaun Orsamentu Jerál Estadu no Kódigu Aprovizionamentu no Kontratu Públiku.
Aleinde ne’e, komisaun mós aprezenta informasaun kona-ba organizasaun institusionál Rejiaun nian, prosedimentu planeamentu, orsamentasaun no ezekusaun orsamentál, nomós regra neʼebé aplikavel ba rekrutamentu no jestaun pesoál.
Jornalista : Alexandra da Costa
Editór : Cancio Ximenes
