VIKEKE, 27 Marsu 2026 (TATOLI)—Reprezentante abitante Suku Builó, Postu Administrativu Ossú, Munisípiu Vikeke, Antônio da Silva, solisita Governu hodi halo reabilitasaun estrada husi Suku Builó ne’ebé liga bá Postu Administrativu Uatulari, atu fasilita populasaun sira halo movimentu lalais.
“Ohin loron ita haree estrada rurál husi ami-nian di’ak ona, maibé ita haree estrada husi Builó mosu iha área Edmumu, Postu Uatulari seidauk di’ak. Tan ne’e, ami husu ba Governu atu reabilita atu ami bele asesu tanba ami-nia plantasaun ne’ebé barak no fasilita ami-nia konetividade entre postu ida bá postu seluk besik liután,” Antônio da Silva ba TATOLI iha Suku Builó, Sesta ne’e.
Nia dehan, entre Postu Ossú no Postu Uatulari bainhira estrada ida-ne’e Governu reabilita sei ajuda tebes populasaun husi postu rua ne’e la’o besik merkadu.
Hatán ba preokupasaun ne’e, Diretór Servisu Obra Públika Munisípiu (SMOP) Vikeke, Casildo S. Gomes haktuir, kona-ba estrada husi Builó liga bá Uatumaluli no Edmumu, parte SMOP halo ona levantamentu dadus estrada nian no aprezenta ona ba ministériu hodi tau planu.
Enkuantu, estrada husi Suku Builó liga bá Uatumaluli no Edmumu ho totál kilómetru 4.7. Bainhira estrada referida reabilitadu sei benefísia populasaun husi Postu Uatulari no Ossú.
Jornalista: Vitorino Lopes da Costa
Editór: Xisto Freitas da Piedade
