KOVALIMA 19 Maiu 2026 (TATOLI)- Autoridade Munisípiu Kovalima (AMK) la iha atividade animasaun ba komunidade sira, iha ámbitu komemorasaun loron restaurasaun independénsia Timor-Leste ba dala-24 (20 Maiu 2002-20 Maiu 2026 ) tanba udan.
“ Ita-nia preparasaun atu komemora loron restaurasaun independénsia 20 Maiu ba da-24 ita forma ona komisaun organizadora ne’ebé lidera husi sekretáriu Munisipál asuntu sosial no organizasaun komunitáriu nune’e autoridade Kolivama preparadu ona atu komemora 20 Maiu maibe kestaun udan, nune’e laiha animasaun”,PAM Kovalima Migueal Armada Cardoso informa jornalista sira iha AMC.
Autoridade ne’e dehan, Autoridade Kovalima komemora 20 Maiu la realiza atividade animasaun ba sira tanba haree ba situasaun udan, nune’e mosu dazestre natural hanesan inundasaun
Atu Komemora 20 Maiu ba dala-24 autoridade Kovalima prevee orsamentu rihun $8-resin husi orsamentu ne’e aloka ba postu administrativu hitu hanesan postu administrativu Maucatar aloka $ 750 no mós postu administrativu sira seluk.
Iha ambitu atu komemora 20 Maiu Autoridade Kovalima husu komunidade sira atu partisipa másimu iha serimónia isar bandeira ne’ebé munisípiu Kovalima sei hala’o iha kampu Ladi.
Iha sorin seluk Administradór postu administrative Maucatar,Laurentino de Jesus informa, atu komemora loron restaurasaun Independénsia Timor-Leste Autoridade Kovalim aloka orsamentu $ 750 ba Postu Administrativu Maucatar
“Autoridade Kovalima aloka orsamentu $ 750 mai ami postu administrative Muacatar hodi movilita komunidade atu komemora loron restaurasaun Independénsia Timor-Leste hamutuk ho ha’u nia komunidade sira”.nia dehan.
Atu Komemora 20 Maiu Autoridade Kovalima hahú ho atividade dada rifa nune’e bele anima komunidade sira iha ámbitu komekora loron restaurasaun Indepenénsia Timor-Leste 20 Miau iha postu administrativu Maucatar.
Jornalista: Celestina Teles
Editór: Florencio Miranda Ximenes
