DILI, 08 Juñu 2026 (TATOLI)—Komisáriu Komisaun Rekrutamentu Juíz Supremu Tribunál Justisa, José Pedro Camões, hateten, Konsellu Superiór Majistratura Judisiária Portugal responde ona karta ne’ebé Komisaun haruka iha Fulan-Maiu kotuk.
“Konsellu Superiór Portugal admite tiha ona ema na’in-tolu, hanesan Juíz sira ne’ebé juviladu ho serbisu mais de 25 anos de esperiéncia. Bele dehan katak, karta ami haruka iha fimde Maiu hetan ona nia resposta, resposta ne’e iha rua, ida pur karta, ida via telefone,” Pedro Camões hato’o ba Jornalista sira iha Tribunál Judisiál Primeira Instánsia Dili (TJPID), Segunda ne’e.
Nia dehan, Konsellu Majistratura Portugal konkorda ona ho pedidu ne’ebé Komisáriu sira haruka ba.
“Entaun, sira aseita como ita agora iha Juñu, tuir planu Komisáriu na’in-tolu ho ema tékniku na’in-rua iha Dili sei halo reuniaun ho juri sira iha Portugal, posibilidade iha semana ida-ne’e Komisáriu na’in-tolu inklui tékniku na’in-rua sei ko’alia ho Konsellu Superiór Majistratura Judisiária Portugal hodi ko’alia kona-ba rekrutamentu Juíz sira ne’ebé tuur iha Supremu Tribunál Justisa,” nia akresenta.
Notísia relevante : Komisaun Rekrutamentu ba Juíz STJ husu KSMJ Portugal disponibiliza juri
Tuir planu, Komisaun Rekrutamentu na’in-tolu inklui tékniku na’in-rua sei hahú halo viajen ba Portugal, hahú loron-10 to’o 12 Juñu no sei halo enkontru ho Konsellu Superiór Majistratura Judisiária Portugal iha loron 13 t’oo 15 Juñu ne’e.
“Runiaun ida-ne’e para atu troka ideia de’it saida mak juri sira bele halo iha Timor, ho saida mak Komisáriu sira iha Timor prepara ona. Pur ezemplu buat ruma ne’ebé ami aprova ona hanesan ami-nia Komisáriu Prezidente ko’alia filafila, katak aprova ona rejime enternu ne’e lori bá no hein katak reuniaun semana oin iha Portugal ne’e bele lori sira (juri) besik liután,” nia katak.
Komisáriu hatutan, karik buat hotu la’o di’ak no laiha falla, maka iha inísiu Fulan-Jullu ne’e iha abertura ona ba konkursu rekrutamentu Juíz ba Supremu Tribunál Justisa.
Tanba reuniaun sira ne’e atu trata atividade no kustu sira durante juri sira iha Timor, durasaun serbisu iha Timor, ho rezultadu ne’ebé mak Komisáriu hakarak, juri bele halo.
Nune’e, nia garante katak iha inísiu Fulan-Jullu Komisaun bele halo abertura ona vaga ba rekrutamentu. Posibilidade funsionamentu Supremu Tribunál Justisa ne’e iha Fulan-Outubru ka Novembru.
Jornalista : Natalino Costa
Editora : Julia Chatarina
