DILI, 09 Juñu 2026 (TATOLI)—Ekipa Selesaun Nasionál Timor-Leste ho naran istimadu Lafaek, ultrapasa ona ba jogu faze grupu ASEAN Hyundai Cup 2026 hafoin halakon adversáriu Brunei Darusalam ho eskor 3-1 iha jogu segundu faze, hafoin iha jogu primeiru faze ekipa Timor-Leste manán 3-0, nune’e TL manán Brunei ho aggregate 6-1.
Notísia Relevante: TL bahat istória foun hamoe Brunei 3-0 iha “playoff” ASEAN Hyundai Cup 2026
Jogu ba ekipa rua realiza iha Malázia, tersa kalan ne’e, ho objetivu atu hadau billete ba jogu faze grupu ASEAN Hyundai Cup 2026 ne’ebé sei hala’o iha tempu besik.
Bainhira jogu hahú ekipa rua lansa kedan kontra no atake ba malu. Brunei lansa atake ne’ebé maka’as hasoru Timor-Leste, basá iha jogu faze primeiru sira sofre ona golu tolu, ho nune’e iha jogu ne’e sai hanesan oportunidade ba sira atu normaliza sira nia rezultadu.
Maibé esforsu hotu hela de’it hanesan esforsu, tanba defeza Timor-Leste metin no la fó fatin ba jogadór Brunei atu tama tuir nia hakarak.
Bainhira jogu la’o to’o minutu 43, Azwan Ali Rahman konsege lees uluk rede Timor-Leste nian hodi muda rezultadu ba 0-1. Golu ne’e fó ksolok ba Brunei iha jogu primeira parte.
Husi golu ne’e la hamate jogadór timoroan sira nia esperansa iha kampu laran, jogadór raan timor sira kontinua reziste, maibé apitu primeira parte nian lian, vitoria provizóoriu hela ba Brunei 1-0.
Hakat ba segunda parte, ekpa Lafaek ne’ebé lidera husi treinadór Portugeza José Pedro Salazar halo mudansa ba estrarejia jogu oinsa atu gaña Timor-Leste nia vitoória.
Estratéjia sira la hela de’it hanesan estratéjia basá jogadór sira kombina malu ho di’ak no rona orientasaun treinadór nian. Sira hatudu jogu foun, sira fó duni esperansa ba adeptu timoroan sira.
Sira halo blokeia maka’as, maibé sira mós halo kontra-atake ne’ebé brillante, ikus iha minutu 56 Zion Cruz konsege fura rede Brunei nian hodi hatuur rezultadu sai empata 1-1.
Golu ne’e provoka liután intensidade jogu, iha Estádiu Kuala Lumpur Malázia, jogadór raan Timor sira doko no halo Brunei susar atu book an no susar kontrola bola, liuliu susar atu kombate.
Jogu la’o to’o ba oin, Claudio Osorio, hetan oportunidade xutu dook ida kuaze metru 20 ho velosidade maka’as, guarda rede Brunei labele antesipa bola ho di’ak, nune’e bola tama liu ba rede laran hodi muda rezultadu. 2-1 ba Timor-Leste.
Golu ne’e fó liutan esperansa ba Timor-Leste basá iha ona hanoin katak ultrapasa duni iha jogu kualifikasaun ne’e. Brunei la nonook, nafatin halo kontra-atake maibé defeza Timor-Leste la fó fatin.
Jogu la’o to’o minutu 80 kontra-atake ida maka’as husi Timor-Leste, jogadór suplente Otansio Guterres, termina Timor-Leste nia vitória ho golu ikus. 3-1 ba Timor-Leste.
Husi vitoria ne’e lori Timor-Leste hakat ona ba faze grupu A ne’ebé hamutuk ho nasaun sira hanesan Kamboja, Indonézia no Sungapura.
Entretantu, Grupu B kompostu hosi Tailándia, Malázia, Filipina, Myanmar, no Laos. Ekipa nasionál Timor-Leste nian sei kompete iha kampeonatu futeból ne’ebé prestijiadu liu iha Sudeste Aziátiku, Tasa Hyundai ASEAN 2026 nian. Ida-ne’e sei sai hanesan edisaun ba da-30 husi kampionatu ne’e dezde nia inisiativa hahú hala’o iha tinan 1996.
Tasa ASEAN Hyundai 2026 sei sai hanesan palku ida ba ekipa futeból di’ak liu sira rejiaun nian hodi kompete ba koroa Kampeaun ASEAN nian, ne’ebé agora daudaun kaer husi Vietname hafoin halakon Tailándia iha finál 2024 nian.
Hyundai Cup sei hala’o iha loron 27 Jullu to’o 26 Agostu, ho nasaun 11 ne’ebé partisipa hodi kompete atu sai di’ak liu. Ekipa ida tenke kualifika ba jogu playoff entre Brunei Darussalam no Timor Leste, ne’ebé sei hala’o iha loron 2 no 6 fulan-juñu tinan 2026, ohin loron Timor-Leste mak sai manán-na’in iha kualifikasaun ne’e.
Iha faze grupu, kada ekipa sei halo jogu haat, kompostu husi jogu rua iha uma no jogu rua iha li’ur. Manan-na’in sira husi grupu no vise-kampeun sira sei hakat ba semi-finál sira. Iha meia-finál, jogu sira sei hala’o iha formatu jogu rua iha uma no sai, hanesan mós ho finál.
Jornalista : Hortêncio Sanchez
Editór : Cancio Ximenes
