VIQUEQUE, 21 jullu 2022 (TATOLI)–Ministru Administrasaun Estatál (MAE), Miguel Pereira de Carvalho, kinta ne’e, inaugura edifísiu postu administrativu Uatucarbau, munisípiu Viqueque.
“Ohin ha’u mai halo inagurasaun ba edifísiu postu Uatucarbau, ne’ebé integradu iha Planu Integradu Dezenvolvimentu Munisipál (PIDM) no harii iha tinan 2019,” Ministru hateten ba jornalista sira iha postu administrativu Uatucarbau, kinta ne’e.
Ministru konsidera konstrusaun edifísiu ne’e importante tebes atu ajuda serbisu administrasaun postu bainhira halo reuniaun no halo atendimentu ba komunidade.
“Ha’u kontente tebes tanba edifísiu Uatucarbau ho kualidade di’ak. Halo kedas iha sentru Uatucarbau no funsionáriu sira bele uza halo atendimentu ba ita-nia komunidade,” nia akresenta.
Notísia relevante: MAE sosializa matadalan implementasaun PMOPA autoridade sira iha Viqueque
Iha fatin hanesan, Diretór empreza Luminar UNIP. LDA, Joanina de Araújo Amaral, informa, asina kontratu serbisu iha agostu 2019, ho durasaun serbisu fulan-neen.
“Ami hasoru dezafiu barak, liuliu materiál konstrusaun, hafoin mosu tan COVID-19. Tanba ne’e maka agora foin halo inaugurasaun,” nia tenik.
Orsamentu ba konstrusaun edífisiu postu Uatucarbau inklui morru haleu edifísiu hamutuk $197.429,13, enkuantu konstrusaun hahú iha agustu 2019 no finaliza iha tinan 2022.
Serimónia ne’e partisipa hosi Administradór munisípiu Viqueque, Januário Soares ‘Bolly’, Administradór postu Uatucarbau, direjente Programa Nasionál Dezenvolvimentu Suku (PNDS), xefe suku no komunidade lokál.
Jornalista : Vitorino Lopes da Costa
Editora : Julia Chatarina
