DILI, 04 agostu 2022 (TATOLI)— Komandu Polísia Nasionál Timor-Leste (PNTL), Munisípiu Dili ho apoia hosi ekipa konjunta, detein suspeitu na’in-31 ne’ebé envolve iha konfrontu tuda malu entre estudante iha área suku Becora, postu administrativu Cristo-Rei, munisípiu Dili.
Iha tuku 11:00 dadeer, kinta ne’e, akontese konfrontu tuda malu entre estudante hosi Eskola Sekundária 12 Novembru no Estudante Sekundária 5 de Maio, hodi rezulta karreta patrollu Eskudra Cristo-Rei rahun no membru PNTL eskuadra Cristo-Rei ida hetan kanek.
“Ita konsege detein ona suspeitu nain-31, kompostu hosi estudante eskola rua ne’e no daudaun iha sela detensaun Komandu Munisípiu Dili,” Komandante PNTL, Munisipiu Dili, Superintendente Xefe Henrique da Costa, informa ba Agência TATOLI iha nia kna’ar fatin Caicoli-Dili, kinta ne’e.
Komandante ne’e dehan tuir relatóriu katak motivu hosi kazu tuda malu entre estudante eskola rua ne’e tanba deskonfia problema ka iha relasaun ho Grupu Arte Marsiál.
“Ha’u seidauk bele fó sai sira nia inisiál tanba daudaun ne’e, iha prosesu identifikasaun no investigasaun hosi investigadór Komandu PNTL munisipiu Dili nia,”nia afirma.
Hosi konfrontu ne’e rezulta karreta patrolla Eskuadra Cristo-Rei rahun no membru PNTL Eskuadra Cristo-Rei ida kanek iha parte ain tanba hetan tuda hosi estudante sira.
“Konfrontu ne’e rezulta Xefe Investigasaun Eskuadra Cristo-Rei hetan tuda iha ain no karreta ida maka rahun no membru ida kanek ekipa sira lori ona ba ospitál hodi halo tratamentu saúde no fila kedan mai halo serbisu hanesan bainbain,” nia akresenta.
Daudaun, Komandante PNTL Dili ne’e hatutan situasaun la’o normal ona, hafoin PNTL Eskuadra Cristo-Rei hetan apoia hosi Eskuadra Dom-Aleixo no Nain-Feto, Vera-Cruz no Forsa Rezerva (Taskforce) Komandu Dili no Batalaun Orden Públiku hosi Unidade Espesiál Polísia (UEP) halo intervesaun hodi hakalma situsaun iha fatin akontesimentu.
Jornalista : Natalino Costa
Editór : Florencio Miranda Ximenes
