VIQUEQUE, 24 outubru 2022 (TATOLI)—Governu liuhosi Ministru Koordenadór Asuntu Ekonómika (MKAE), Joaquim Amaral no Sekretáriu Estadu Kooperativa (SEKoop), Elizário Ferreira, segunda ne’e, lansa distribuisaun cesta bázika daruak iha suku Luka, postu administrativu Viqueque vila, munisípiu Viqueque.
“Ita halo distribuisaun cesta bázika iha parte leste, iha munisípiu Viqueque, Baucau no Lautém, ne’ebé ita hahú halo lansamentu iha munisípiu Viqueque, hotu sei kontinua ba munisípiu Baucau. Nune’e ita lansa iha suku Luka depois ba postu administrativu haat, munisípiu Viqueque,” Ministru Koordenadór Asuntu Ekonómika, Joaquim Amaral, hateten liuhosi ninia diskursu iha lansamentu distribuisaun cesta bázika, iha suku Luka.
Governu implementa programa nasionál ne’e atu motiva no ajuda produtór sira liuhosi agrikultór no empreza sira.
“Ita haforsa parte rua tanba sira hanesan ai-rin no autór ba ita-nia ekonomia, enkuantu produsaun laiha merkadu mós la funsiona, ita depende ba merkadu internasionál. Ita hetan osan oituan hosi idozu no veteranu, sei gasta barak hodi sosa produtu importasaun. Situasaun ne’e bainhira Timor-Leste hasoru krize kauza hosi COVID-19 tanba iha nasaun hotu sira prefere rai produtu hodi fa’an iha sira-nia merkadu do que sira fa’an ba rai seluk. Iha situasaun sira ne’e ita bele iha osan, maibé ita sente presiza produsaun boot atu ita bele konsumu iha situasaun krize no distribuisaun globál ne’ebé sirkulasaun ladún normál,” nia akresenta.
Notísia relevante: MTKI konklui distribuisaun produtu Cesta Bázika iha suku Lahomea Bobonaro
Aleinde ne’e, governante ne’e konsidera programa cesta bázika bele hasa’e produsaun no bainhira produsaun sa’e presu produtu iha merkadu bele tun hodi garante seguransa ai-han no fó rendimentu hodi diversifika ekonomia rai-laran.
Ekonomia Timor-Leste durante ne’e depende de’it hosi rendimentu mina ne’ebé la sustentável no to’o tempu ida mina sei tama iha situasaun krítiku. Tanba ne’e maka programa sira hanesan cesta bázika sai programa nasionál ne’ebé importante hodi hametin soberania ai-han, seguransa ai-han no hametin independénsia hanesan nasaun soberania ida.
“Ho ida-ne’e ita hatene uza rekursu hotu ne’ebé rai ne’e fó ba ita. Governu sé de’it maka ukun ita la’o ho ita-nia ritmu ne’ebé sei la depende ba ai-han importasaun sira,” nia hato’o.
Iha fatin hanesan, Reprezentante Administradór munisípiu Viqueque, Cosme Sarmento, agradese ba Governu nia apoiu nesesidade ba komunidade.
“Ho ida-ne’e, ami sente katak na’i-ulun sira hanoin povu sira iha baze,” nia tenik.
Nune’e mós, Benifisiáriu, João Carlos Amaral, sente kontente ba apoiu ne’e no husu atu mantein programa hanesan hodi tulun povu iha baze.
Tipu produtu ne’ebé halo distribuisaun hamutuk 16, kompostu hosi foos kilograma lima, fehuk ropa lokál kilograma ida, batar dulas lokál kilograma ida, na’an-karau isin kilograma ida, ikan maran grama 500, manu-tolun 5, koto grama 500, fore-mungu kilograma ida, lis-mean no lis-mutin grama 500, masin timor ida, mina bimoli masa litru lima, kafé Timór grama 500, sabaun tolu, deterjente kilograma ida, masin-midar grama 800.
Empreza lokál, Hezeldan Unip. Lda mak toma-konta ba distribuisaun iha suku Luka ba benefisiáriu hamutuk 2.336 no suku Caraubalo 6.704.
Durante prosesu distribuisaun akompaña hosi entidade sira hanesan Autoridade Atividade Ekonómia Sanitária no Alimentár, Institutu Públiku (AIFAESA, I.P), Provedoria Direitu Umanu no Justisa (PDHJ), no Komisaun Antí-Korrupsaun (CAC, sigla portugés) inklui partisipa hosi autoridade lokál no Komadante Polísia Nasionál Timor-Leste (PNTL) Viqueque.
Jornalista : Vitorino Lopes da Costa
Editora : Julia Chatarina
