VIQUEQUE, 06 janeiru 2023 (TATOLI)—Suku Macadique, postu administrativu Uatulari, munisípiu Viqueque konsege devolve osan $17.600 ba kofre Estadu hosi subsídiu fim do ano ba kada família ho montante $200.
“Pagamentu finaliza iha semana rua ba kotuk no osan restu ami devolve fali ona ba kofre Estadu,” Xefe suku Macadique, Afonso dos Reis, hateten ba Agência Tatoli, iha sede suku Macadique, sesta ne’e.
Orsamentu ne’ebé devolve ona hosi uma-kain 88, tanba iha membru uma-kain mak naran doubru no membru uma-kain balun simu saláriu mensál $500 ba leten.
Antes ne’e, suku Macadique rejista uma-kain hamutuk 1.843 ho totál orsamentu $368.600, maibé benefisiáriu 1.755 mak simu direitu ho totál pagamentu $ 351.000.
Notísia relevante: Selu reklamante subsídiu $200 sei hein desizaun hosi KM
Maski nune’e, suku Macadique seidauk aprezenta lista reklamante ba munisípiu tanba prosesu rekolla lista hosi aldeia 21.
“Ho ida-ne’e maka lista seidauk aprezenta. Maibé tempu badak ami sei lori lista hosi suku Macadique, ami foin konklui ohin hosi aldeia 21 ba uma-kain 87. Lista sira semana oin ami sei aprezenta ba munisípiu hodi prosesa lista reklamante,” nia tenik.
Biban ne’e, nia agradese ba VIII Governu ne’ebé oferese ona subsídiu $200 ba uma-kain sira atu uza ba nesesidade uma-laran iha tempu loron boot hanesan natál no simu tinan foun ne’e.
Jornalista : Vitorino Lopes da Costa
Editora : Julia Chatarina
