DILI, 19 janeiru 2023 (TATOLI) – Ministru Transporte no Komunikasaun (MTK), José Agustinho da Silva, informa Primeiru-Ministru (PM), Taur Matan Ruak, prosesu investimentu ba instalasaun kabu fibra óptika.
Hafoin reuniaun, membru ezekutivu ne’e dehan projetu investimentu ne’e atinje ona 30% katak hala’o ona serbisu balun.
“Ha’u relata ba Primeiru-Ministru kona-ba projetu estratéjiku Estadu Timor-Leste nian iha setór telekomunikasaun. Projetu ida ne’e atinje ona 30% tanba foin lalais iha ró-ahi ida ne’ebé halo peskiza iha tasi Timór nomós tasi Austrália nian”, José Agustinho hateten, iha Palásiu Governu.
Objetivu hosi peskiza ne’e atu identifika rute tasi-laran karik kabu ne’e dada hosi ne’ebé, liuliu haree hosi tasi-laran, okos no tasi ninia naruk.
Atividade ne’e hala’o durante loron 50 no konklui ona. Ekipa ró-ahi ne’e hetan akompañamentu hosi tékniku Ministériu Transporte no Komunikasaun nian.
“Ekipa sei hato’o relatóriu, nune’e sei identifika tipu kabu ida ho kualidade oinsá maka bele utiliza la’o liu rute ne’ebé sira define. Depois ida ne’e maka halo produsaun ba kabu, tanba kabu la’ós ba foti de’it, maibé tenki liuhosi peskiza ida no identifika tipu kabu mak bele prodús”, nia konklui.
Polítika dada kabu submariñu hosi Darwin mai Timor-Leste nu’udar prioridade Governu Timor-Leste liuhusi kooperasaun ho Governu Canberra, ne’ebé mai ho objetivu atu eleva kapasidade rede internét iha rai-laran tanba Governu Konstitusionál Daualuk iha programa Governu eletróniku ne’ebé persiza liña internét lais.
Governu prevee millaun $41,588 ba verba Fundu Infraestrutura iha proposta Lei Orsamentu Jerál Estadu OJE 2021 hodi halo akizisaun ba ekipamentu informátiku kabu submarinu (fibra óptika).
Nune’e, iha empreza internasionál na’in-20 mak antes ne’e konkorre ona prosesu aprovizionamentu konkursu públiku internasionál, hodi sosa no instala ekipamentu kabu submarinu.
Rekorde katak Governu Timor-Leste no empresa Alcatel Submarine Network (ASN) asina ona, iha maiu 2022, kontratu ba akizisaun no instalasaun ligasaun dijitál iha Timor-Leste, liuhusi kabu submarinu iha sidade Darwin no Port Hedland iha Commonwealth Austrália nian.
Projetu ne’e konta ho millaun $38,6 no iha durasaun entre 01 jullu 2022 no 31 janeiru 2024.
Notísia relevante : Governu no empreza ASN selebra kontratu implementa projetu fibra ótika
Jornalista: Antónia Gusmão
Editora: Maria Auxiliadora
