DILI, 04 marsu 2023 (TATOLI)—Partidu Demokrátika Repúblika Timor-Leste (PDRT) ho Partidu Assosiasaun Populár Monárkia (APMT), sábadu ne’e, realiza konferénsia nasionál legaliza koligasaun pre-eleitorál hodi la’o hamutuk iha eleisaun Parlamentár 2023.
Notísia Relevante: Partidu 24 sei konkorre iha eleisaun parlamentár 2023
“Ohin, liu-hosi konferénsia nasionál, ita hotu mai iha ne’e tuur hamutuk hanoin koligasaun partidu rua ne’e la’o ba oin, komferénsia ne’e aprova draft iha ona ba dokumentu legal,” Prezidente PDRT, Agostinho Gomes, hateten iha nia intervensaun iha ámbitu konferénsia nasionál partidu nian iha salaun CNE, Caicoli.
Nune’e, partidu rua ne’e avansa pakote ida hodi la’o hamutuk iha eleisaun Parlamentár mai, ne’ebé konferénsia nasionál ne’e ho objetivu halo forsa entre partidu rua hakat ba eleisaun Parlamentár.
Iha konferénsia ne’e, diskute kona-ba estatutu hodi regula lala’ok koligasaun ne’e ba oin to’o ba iha Parlamentu no Governu oinsá bainhira partidu hetan konfiansa eleisaun lejislativa.
Nia dehan, prosesu to’o koligasaun, hosi PDRT hetan komunikasaun hosi partidu rua maibé la konsege no konsege de’it mak ho APMT tanba partidu rua ne’e nia istória hanesan mai hosi povu ai-leba.
“Ikus mai ho APMT, la konvida malu, ami hetan laran monu ba malu, tanba istória naruk hosi partidu ne’e mai hosi ai-leba,” nia dehan.
Objetivu koligasaun iha kualker partidu politiku nia luta atu ba ukun, maibé ukun oinsá, entaun nasaun ne’e la’o ba oin e’e tenke faan partidu nia programa no hapara ona hatun malu, ne’ebé partidu rua ne’e tenke sai forsa alternativu hodi fo solusaun, hodi konvense eleitoradu ba iha Parlamentu no posibilidade ba iha Governu.
“PDRT-APMT sei sai forsa alternativa, konvite ita liu barreira, PDRT mesak liu ona barreira no AMPT mai ita bele aumenta importante mak serbisu hamutuk. Se dala ida tan bainhira ba ukun tanba la’ós kadeira maibé ita hatudu programa, aseita ona tenke tinan-tinan tau orsamentu,” nia hateten.
Notísia Relevante: Kampaña eleitorál ba Eleisaun Parlamentár sei hahú iha 19 abríl
Prezidente PDRT ne’e husu estrutura no militante hotu atu serbisu makaas hodi hakat barreira iha eleisaun Parlamentár mai, no partidu koligasaun ne’e ninia kampaña mai sei halo modelu door-to-door (tama uma sai uma) hodi hametin baze, no mós husu ba estrutura munisipiu estabelese ba to’o aldeia ne’ebé seidauk iha, tanba baze boot -liu ba iha ne’eba, no se bele rekruta ona brigadista ba eleisaun mai.
Prezidente APMT, Pedro da Costa Ramalho, hateten APMT la’ós partidu ida foin moris maibé moris iha tinan 1946 iha Portugál hodi mai iha Timor-Leste, ne’ebé iha hanoin hanesan hodi halo koligasaun ho PDRT.
Enkuantu, tuir ajenda koligasaun partidária rua sei ba iha Tribunál Rekursu iha domingu aban hodi halo rejista kandidatu.
Iha fatin hanesan, Xefe Departamentu Planeamentu Sekretáriadu Tékniku Administrasaun Eleitorál (STAE), Domingos Bernabe, hateten komferénsia partidu rua ne’ebé realiza ho didi’ak, no iha tempu badak STAE sei hato’o karta ba partidu no koligasaun partidária ne’ebé rejista ona iha Tribunál partisipa iha eleisaun mai hodi prezenta pontu fiskal, tan ne’e partidu no koligasaun partidária hotu sai parseiru di’ak ba STAE.
Notísia Relevante: Prezidente Repúblika dekreta loron eleisaun Parlamentár iha 21 maiu
Jornalista : Nelson de Sousa
Editór : Cancio Ximenes
