DILI, 14 maiu 2023 (TATOLI)–Komisaun Reguladór Arte Marsiál (KRAM), domingu ne’e, urjentemente bolu líder organizasaun arte marsiál rua hanesan Persaudaraan Setia Hati Terate (PSHT) no Federasaun Wushu hodi husu klarifikasaun relasiona insidente ne’ebé akontese iha Loromata, suku Fatuhada, postu administrativu Dom Aleixo, munisípiu Dili, iha sábadu (13/05) kalan, ne’ebé rezulta joven ida sai vítima.
Prezidente KRAM, Fernando da Costa, hateten, parte rua konfirma katak insidente ne’ebé akontese la’ós problema entre organizasaun.
“Líder PSHT konfirma katak loos duni membru ne’ebé sai vítima mai hosi PSHT. Iha parte seluk líder Federasaun Wushu rona katak parte sira mak sai nu’udar suspeitu na’in-ida mai hosi organizasaun arte marsiál Wushu, nune’e PSHT no Wushu hakarak husik kazu ne’e ba Polísia no tau fiar ba Polísia nia investigasaun hodi estabelese faktu loloos, nune’e bele lori justisa ba vítima no nia família,” Prezidente KRAM, relata liuhosi nota imprensa ne’ebé Agência Tatoli asesu, domingu ne’e.
Aleinde ne’e, KRAM sente triste ho insidente ne’ebé akontese ona tanba dala-ida tan joven ida tenke lakon nia vida.
Tanba ne’e, komisaun ne’e husu parte hotu tenke respeita prosesu investigasaun no hein katak justisa sei la’o ho justu. KRAM kontinua halo nia serbisu atu komunika no koordena ho parte relevante sira ne’ebé halo serbisu relasiona ho insidente ne’e.
Notísia relevante : Polísia kaptura suspeitu rua hosi kazu konfrontu iha Bairu Pité
“Hosi parte KRAM kontinua komunika ho organizasaun arte marsiál hotu hodi kontinua bolu atensaun ba nia membru sira atu labele monu ba provokasaun no labele provokadu ho tentativa oin-oin mak bele estraga naran di’ak organizasaun sira. Komisaun mós husu ba organizasaun Ida-idak atu mantein kontrolu másimu ba nia membru sira, no kontinua implementa ‘deklarasaun dame’ ne’ebé halo hamutuk ona entre membru organizasaun arte marsiál, iha Gináziu iha 13 abríl liubá. Husu mós ba organizasaun hotu atu koopera ho Polísia Nasionál Timor-Leste (PNTL) no fó apoia másimu ba serbisu Polísia hodi fó susesu ba eleisaun no mantein dame iha ita-nia rai,” Prezidente KRAM bolu atensaun.
Líder hosi PSHT ho Federasaun Wushu seidauk bele haktuir kronolojia klaru no seidauk bele hetan motivasaun loloos hosi insidente ne’ebé mak akontese, maibé iha diskusaun entre parte rua, aseita katak insidente ne’e envolve duni membru hosi PSHT no membru na’in-ida hosi Wushu.
Organizasaun la orienta organizasaun halo violénsia
Iha sorin seluk, Koordenadór PSHT Rayon C. Jaime da Cruz, klarifika katak insidente iha Loromata la’ós kazu ataka malu entre organizasaun arte marsiál sira.
“Sira hotu mak envolve ona iha insidente ne’e, tantu nu’udar vítima no suspeitu la hetan orientasaun ruma hosi organizasaun no hakarak deklara ho firmi katak organizasaun PSHT no Federasaun Wushu nunka haruka nia membru sira halo violénsia hasoru sé de’it no saida de’it. PSHT ho Federasaun Wushu kontinua haklaken nafatin deklarasaun dame mak ne’ebé halo ona,” Koordenadór dehan.
Nune’e, líder hosi PSHT nian husu atu membru hotu kontinua mantein situasaun hakmatek no la monu ba provokasaun oin-oin ne’ebé tenta atu halo foer organizasaun nia naran.
“Timor-Leste lakon nia joven ida tan, PSHT lakon nia membru ida, no ami triste hamutuk ho família matebian mak lakon ona sira-nia oan iha insidente horiseik (sábadu). Ami husu atu membru hotu kontinua hakmatek no tau interese Estadu, interese organizasaun nian boot liu interese pesoál. Mai ita hamutuk hakotu ona korrente violénsia ida-ne’e no ita hamutuk asegura ita-nia eleisaun,” nia apela.
Biban hanesan, Sekretáriu Jerál Federasaun Wushu, José Marçal, akresenta, Federasaun rasik sente triste ho insidente ne’e no hakarak kontinua husu atu membru sira hakmatek no halo esforsu atu la envolve iha violénsia saida de’it.
“Ami sente triste ho insidente ne’ebé akontese, ami mós sente saida mak família matebian sente. Ami sei kontinua husu ami-nia membru sira, karik sira envolve iha insidente ne’e, atu hatudu sira nia responsabilidade. Mai ita hotu hatudu ita-nia responsabilidade ba nasaun hodi mantein situasaun hamatek durante’e eleisaun,” Sekretáriu Jerál fó hanoin.
Polísia detein ona joven na’in-12
Relasiona ho insidente iha área Loromata hodi halo joven, Bernadino Ximenes Brites (20) lakon vida, hakanek FAG (20) iha parte ulun no SLP (19) iha parte kanoruk no ain tuur, PNTL liuhosi serbisu sekreta Makikit asegura uluk joven mane na’in-hitu ne’ebé perturba orden públika hodi tuda malu iha área Loromata, iha aldeia 03, suku Fatuhada, postua administraivu Dom Aleixo, munisípiu Dili iha loron 13 maiu 2023.
Bazeia ba nota ne’ebé Agência Tatoli asesu, haktuir katak hafoin asegura joven na’in-hitu ne’e ekipa serbisu sekreta Makikit dezenvolve kazu ne’e hosi vítima ho inisiál FAG (20) ne’ebé hetan tá iha parte ulun nu’udár mós sasin okulares deklara sai tan suspeitu prinsipál balun nia naran.
Nune’e, ekipa halo kedas koordenasaun serbisu ho ekipa konjunta hodi ba buka tuir suspeitu sira ne’ebe vítima deklara ona.
Ekipa konjunta ne’e lidera hosi Xefi Servisu Informasaun Polísia Nasionál (SIPN), Makikit, Eskuadra PNTL Dom Aleixo, Servisu Nasional Intelijensia (SNI), Unidade Falintil (UF), Servisu Informasaun Militar (SIM) no MD1 hosi instituisaun FALINTIL-Forsa Defeza Timor-Leste (F-FDTL), inklui Forsa Rezerva.
“Ekipa konjunta iha oras, 23:35 otl sai hosi Lorumata hodi buka tuir suspeitu ida ho naran D M (32), hela iha Loromata no kaptura iha área Fomentu, Ponte III no nia rekuza hodi hatudu tan nia maluk seluk nune’e ekipa mós ba foti tan HG (32) inklui MSC (30), FL (28) no JS (41) iha fali área Kampung Baru. Bainhira ekipa ba foti HG konsege halai nune’e ekipa duni tuir hodi kaptura iha mota laran, ne’ebé ikus mai nia deklara katak foin fila hosi serbisu no la hatene buat ida tanba akampaña halo kobertura ba atividade kampaña partidu polítiku balun iha munisípiu Baucau,” refere nota.
Enkuantu, JS mós deklara katak rai hela tudik ida iha uma kalen leten, nune’e ekipa halo buska ba suspeitu sira-nia uma no konsege hetan evidénsia sasán kro’at balun hanesan tudik komandu ida ho maubeka ida iha JS nia uma leten, iha fali JS nia viziñu hetan mós katana ida iha armáriu okos, maubeka ida meza leten no maubeka ida bidon doku sanyo bee taka metin hela.
“Sira ne’ebe ekipa serbisu lori mai ne’e tanba sira-nia naran vítima temi, entaun ekipa halo identifikasaun ba sira nu’udar meiu ida hodi deskobre informasaun ba autoridade seguransa sira ligadu ho autór prinsipál ne’ebé komete kazu omesídiu grave hodi hakotu ona ema-nia vida. Aleinde ne’e, sira mós hela hotu iha área Loromata, aldeia 03, suku Fatuhada besik malu ho vítima na’in-tolu ne’e,” nota esplika.
Hafoin ekipa investigadór hosi Eskuadra PNTL Dom Aleixo konklui identifikasaun, halo kedas auto entrega ba iha Komandu PNTL, munisípiu Dili atu kontinua halo investigasaun hodi hatene kle’an liu motivu akontesementu ne’e.
Jornalista : Antónia Gusmão
Editora : Julia Chatarina
