DILI, 27 setembru 2023 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova projetu rezolusaun Governu, kona-ba kontribuisaun voluntáriu ho valór rihun $100 ba Sentru Koordenasaun Asisténsia Umanitária ASEAN ka ASEAN Coordinating Center for Humanitarian Assistance (AHA Center).
Projetu rezolusaun ne’e aprezenta hosi Ministru Negósiu Estranjeiru no Kooperasaun ein ezersísiu, Agio Pereira no Vise-Ministra ba Asuntu ASEAN, Milena Maria da Costa Rangel.
“Fundu ida-ne’e ho nia objetivu atu apoia atividade monitorizasaun katástrofe entre Estadu membru ASEAN, hamutuk ho organizasaun internasionál sira seluk hodi hatan ba situasaun emerjénsia sira iha rejiaun ne’e,” Ministru Prezidénsia Konsellu Ministru, Agio Pereira, haktuir hafoin reuniaun ezekutivu, iha Palásiu Governu.
Notísia relevante : Timor-Leste kontribui rihun $100 ba sekretaridu tékniku ASEAN iha Jakarta
Aleinde ne’e, kontribuisaun ne’e tanba konsidera serbisu ne’ebé dezenvolve ona hosi AHA Center kona-ba jestaun katástrofe sira.
AHA Center hanesan organizasaun intergovernamentál, ne’ebé estabelese hosi membru ASEAN na’in-10 ho objetivu fasilita kooperasaun no koordenasaun ba jestaun dezastre entre nasaun membru.
Jornalista : Antónia Gusmão
Editora : Julia Chatarina
