DILI, 18 outubru 2023 (TATOLI)—Governu garante nafatin vijilánsia ba timor-oan iha Israel, nune’e sira bele sente seguru no bele hela nafatin iha país ne’e.
“Kontinua halo vijilánsia ba situasaun sai hanesan prioridade ida ba Governu Timor-Leste, ne’ebé sei foti medida adisionál sira, karik presiza hodi asegura sidadaun sira-nia moris di’ak iha Israel,” ortavós Governu no atuál Ministru rezidénsia Konsellu Ministru, Agio Pereira, hateten, liuhosi nota ne’ebé Agência Tatoli asesu, kuarta ne’e.
Governu Timor-Leste informa katak sidadaun timor-oan na’in-51 daudaun ne’e iha Israel hodi tuir kursu Agrikultura no Ortikultura iha Sentru Internasionál Formasaun Agríkola Arava (AICAIT) nian, ne’ebé antes ne’e deklara ona katak sira hakarak nafatin hela iha Israel, tanba maski iha eskala konflitu entre Israel no Palestinianu sira, situasaun iha rejiaun ne’e hakmatek.
Notísia relevante : Estudante AICAT 51 iha Israel seguru
Desizaun ida-ne’e, tuir deklarasaun hosi Diretora AICAIT, Dafna Gommershtadt, asegura ona katak estudante sira iha Arava hotu-hotu di’ak no iha situasaun seguru no hahú hosi loron 16 outubru ne’e, estudante sira hahú fali ona sira-nia estudu.
Hodi konsidera desizaun estudante sira-nian no garante seguransa ne’ebé fornese hosi Diretora AICAIT, Governu Timor-Leste deside hodi suspende kontaktu haruka fila hikas estudante timor-oan sira mai Timor-Leste. Maibé, Governu sei mantein kontaktu regulár ho sidadaun hirak-ne’e hodi fornese informasaun atualizada no koordena ho autoridade relevante hodi garante seguransa.
Funu hahú entre Hamas no Israel iha loron 07 outubru, ne’ebé sai hanesan eskalasaun foun hosi konflitu entre Israel no Palestina.
Grupu Hamas kontrola Gaza no lansa atake boot ba rejiaun Israel iha sábadu, semana rua liubá. Nune’e, Israel hatan ho deklarasaun funu, ne’ebé Tel Aviv invade Gaza iha fatin-fatin.
Jornalista : Antónia Gusmão
Editora : Julia Chatarina
