DILI, 24 novembru 2023 (TATOLI) – Vise Primeiru-Ministru no Ministru Koordenadór Asuntu Ekónomiku no Ministru Turizmu Ambiente, Francisco Kalbuadi Lay, husu ba funsionáriu sira atu labele laran taridu, tanba karta sirkulár ne’ebé fó la’os ba funsionáriu Empreza Públika (EP) no Institutu Públiku (IP) hotu.
“Karta ha’u hasai duni maibé la ba EP no IP hotu, maibé ba EP no IP sira iha ministériu ne’ebé ha’u nian, husu labele laran taridu”, Kalbuadi dehan ba jornalista sira iha Bebora Dili, ohin.
Nia hatan katak ministériu fó sai karta ne’e ba Empreza Públika no Intitutu Públiku ne’ebé tutela ba ministériu, la’os ba hothotu.
Tanba ne’e, ministru husu ba funsionáriu EP no IP hotu labele laran susar tanba Governu sei la hapara funsionáriu sira.
“EP no IP hotu, imi keta laran taridu, imi sei la para servisu, karta ne’e ba de’it ha’u nia ministériu”, nia hakotu.
Nota ofisiál ne’ebé fó sai hosi Vise-Primeiru Ministru no Ministru Koordenadór ba Asuntu Ekonómiku no Ministru Turizmu no Ambiente, notifika ba dirijente másimu hosi IP ho EP katak konsidera ba Dekretu Lei nú 46/2023, 28 jullu ne’ebé estabelese Lei Orgánika ba IX Governu Konstitusionál, hosi artigu 2 no 3, mak solisita ba dirijente sira EP no IP nian atu notifika funsionáriu sira ho kontratadu termu sertu atu konklui kontratu iha 31 dezembru 2023 no laiha ona renovasaun ba kontratu.
Karta ne’e fó sai iha 17 novembru 2023 ho númeru 061/VPM-MCAE/MTA/XI/2023, asina direta hosi Vise Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente.
Jornalista: Hortencio Sanchez
Editór : Zezito Silva
