OÉ-CUSSE, 29 dezembru 2023 (TATOLI) – Servisu Saúde iha Rejiaun Administrativa Espesiál Oé-Cusse Ambeno (RAEOA), seidauk iha desizaun ruma atu hapara no extende kontratu ba funsionáriu kontratadu sira-ne’ebé hala’o kna’ar iha fasilidade saúde sira iha Oé-Cusse Ambeno.
Notísia relevante: La mantein kontratu Profisionál Saúde sei afeta ba vida pasiente
Diretora Servisu Raúde Oé-Cusse, Lolita dos Santos, hateten, avaliasaun dezempeñu kada funsionáriu, submete ona ba Ministériu Saúde, hodi avalia no analiza progresu servisu saúde Oé-Cusse nian durante tinan 2023.
“Maibé to’o agora ita seidauk iha karta ofisiál ruma hosi ministériu kona-bá atu extende ka hapara funsionáriu kontratadu sira iha servisu saúde Oé-Cusse, tanba desizaun hotu iha Ministériu Saúde, atu extende ka hapara sira, tanba ami seidauk simu karta ofisiál atu renova kontratu no hapara kontratu, maske dezenpeñu ita hatama ona antes,” Lolita dos Santos, ko’alia Oé-Cusse, sesta ne’e.
Nia informa, funsionáriu saúde ne’ebé hala’o servisu iha Oé-Cusse, numeru barakliu destaka iha postu saúde no sentru saúde sira, maioria parteira, enfermeiru, enfermeira, tékniku programa sira.
“Ami preokupa tebes, tanba bazea deklarasaun hosi Ministra Saúde, katak atu hapara funsionáriu kontratadu sira iha 31 dezembru 2023 ne’e, maibé atu hapara bazea saida, sirkulár ruma laiha,” nia hateten.
Nia informa, totál funsionáriu servisu iha saúde Oé-Cusse hamutuk 350, permanente na’in-156 no restante kontratadu no koloka iha postu saúde 20 no sentru saúde lima (5) iha territóriu Oé-Cusse.
“Sé hapara impaktu ba atendimentu públiku, tanba durante ne’e ha’u rasik simu ona mensajen hosi pesoál balu, sira husu kona-bá asuntu ne’e, maibé ha’u informa, bainhira seidauk iha karta ofisiál ida, ita labele para, kontinua servisu, hodi hein karta ofisiál ruma hosi nasionál,” nia hateten.
Diretora Saúde ne’e sei komunika ba servisu sentrál liuhosi Ministériu Saúde, atu klarifika loloos pozisaun ba funsionáriu kontratu sira iha servisu saúde Oé-Cusse.
“Sei akontese hapara duni funsionáriu sira, postu saúde balu sei taka, tanba funsionáriu kontratadu barak mak destaka iha baze, permanente kuaze ida rua maibé barak mak kontratadu,” nia informa.
Hanesan postu iha sub-rejiaun Pante Makasar iha suku Bobokase, Maquelab iha suku Taiboko, parte Nítibe nian, postu saúde Oénunu iha suku Suni-Ufe, postu saúde suku Ban-Afi, postu saúde Bítila suku Bene-Ufe, maioria kontratadu hotu inklui fatin seluk-tán.
“Sé Governu hakarak hapara, bele prepara halo rekrutamentu foun fali, tanba bazea mapeamentu kada munisipíu, ita halo kada tinan lima, entaun atu hapara tenke substitui kedas, troka sira tuan ne’e Governu tenke prepara funsionáriu foun, nune’e servisu saúde labale abandona,” nia husu.
Notísia relevante:Angelina Sarmento dúvida ho desizaun hapara funsionáriu IP-EP nia kontratu
Entretantu, antes ne’e Ministra Saúde, Elia dos Reis Amaral, hateten, sei hapara profisionál saúde, sira-ne’ebé maka kontratu remata iha loron 31 dezembru 2023 ne’e.
“Ba pesoál saúde sira-ne’ebé mak ninia kontratu sei remata iha iha 31 dezembru 2023 ne’e tenke hapara, depois kontinua ba rekretutamentu, entaun sira-ne’ebé termina kontratu bele konkore ba vaga ne’ebé maka Ministériu Saúde loke, atu nune’e bele fó atendimentu ba populasaun sira iha ita-nia rain,” Ministra Elia Dos Reis Amaral hateten.
Jornalista: Abílio Elo Nini
Editór: Evaristo Soares Martins
