DILI, 10 Maiu 2024 (TATOLI) – Peskadór sira iha Bobonaro, Lautém no Rejiaun Administrativu Espesiál Oé-Cusse Ambeno (RAEOA) sei simu ró 15 husi Ministériu Agrikultura, Pekuária, Peska no Floresta (MAPPF).
Diretór-Jerál Peska, Akikultura no Jestaun Rekursu Akuátiku, Celestino Barreto, informa ró ba agrikultór sira iha RAEOA daudaun iha ona portu Dili atu transporta bá no munisípiu rua seluk sei haruka iha semana oin.
“Ita sei apoiu ró neen ba Bobonaro, haat ba Lautém no lima ba RAEOA, nune’e ita-nia peskadór sira bele hala’o sira-nia atividade peska ho di’ak”, dirijente ne’e informa ba Tatoli iha Comoro, ohin.
Ho apoiu ró ne’ebé maka Ministériu Agrikultura disponibiliza ba agrikultór sira ne’e bele responde ona preokupasaun husi grupu peskadór sira no ministériu iha planu atu sosa tan ró unidade 25 hodi apoiu tan ba grupu sira seluk.
“Distribuisaun ró sei la’o nafatin to’o bainhira peskadór sira la presiza ona. Ministériu iha nafatin obrigasaun atu prepara kondisaun, nune’e bele tulun peskadór sira. Diresaun iha ona planu ba tinan oin atu tau kondisaun di’ak iha arte peska ne’ebé sai hanesan pilotu ida hodi moderniza atividade tradisionál sai modernu. Intensaun atu dudu grupu peska sira ne’ebé sei ki’ik bele hakat ba semi indústria”, dehan.
Celestino Barreto informa katak MAPPF sei tau osan rihun $400-resin hodi moderniza atividade peska no espera katak planu no atividade 2025 nian ne’e bele hetan konsiderasaun hodi alkansa mehi ne’ebé iha.
Rekorde katak Ministériu Agrikultura distribui antes ona ró fiberglass 11 ba peskadór sira iha Covalima, Ainaro no Lautém atu fasilita sira hodi hala’o sira-nian atividade peska.
MAPPF sosa, iha 2022, ró hamutuk 110 ho montante osan rihun $500 no ró ne’e ho nia kapasidade PK15. Husi totál númeru ne’e, konsege distribui ona 55 ba peskadór sira iha Dili no Ataúro unidade 14, Liquiçá sia, Viqueque 20, Manufahi neen, inklui Manatuto neen. Ba 2024, Governu prevee verba rihun $200 hodi sosa tan ró besik 40.
Notísia relevante: Grupu agrikultór no peskadór iha Covalima simu tratór haat no ró neen husi MAPPF
Jornalista: Tomé Amado
Editora: Maria Auxiliadora
