DILI, 15 maiu 2024 (TATOLI)—Servisu Edukasaun munisípiu Liquiçá, tinan ne’e, aloka orsamentu $1.094.730 ba programa merenda eskolár, ne’ebé Eskola Ensinu Pre-Eskolár (EPE) no Ensinu Báziku (EB) hamutuk 98 mak sai benefisiáriu ba programa ne’e.
“Merenda eskolár daudaun ne’e la’o ona iha ita-nia eskola sira iha Liquiçá,” Diretór Servisu Edukasaun munisípiu Liquiçá, Júlio da Silva, informa ba Agência Tatoli, via telefónika, tersa ne’e.
Notísia relevante : Atribuisaun orsamentu programa merenda eskolár bazeia ba totál estudante
Estudante ne’ebé asesu ba programa ne’e hamutuk 20.852, kompostu husi mane 10.804 no feto 10.142.
Husi EPE iha 35, estudante mane 1.011 mak sai benefisiáriu ba programa no feto iha 1.106, enkuantu EB 63 iha estudante mane 9.793 no feto 9.042.
“Agora hosi totál osan alokadu ba programa merenda eskolár, EPE nian $105.892,50 no EB $988.837,50,” nia informa.
Direitora Edukasaun munisípiu Aileu, Beatriz de Deus Torrezão, hateten, implementasaun programa merenda eskolár iha munisípiu Aileu la’o ho di’ak no menu sira ne’ebé uza ba programa nasionál ne’e tuir manuál.
“Merenda eskolár hahú la’o ona desde iha loron 22 abríl, agora kona-ba menu ita la’o tuir manuál. Tanba ne’e, menu ne’e mak na’an no ai-fuan. Ami asina kontratu ho Ekipa Jestaun Programa (EJP) sira no daudaun sira mak tein ba ita-nia estudante sira. Iha EJP hamutuk 14 maka asina kontratu ho Prezidente Autoridade,” nia dehan.
Totál Eskola EB hamutuk 77 ho totál estudante 12.099 kompostu husi mane 6247 no feto 5.852, ba EPE hamutuk 40 ho totál estudante 1.654 kompostu husi mane 874 no feto 780.
Jornalista : Osória Marques
Editora : Julia Chatarina
