DILI, 19 juñu 2024 (TATOLI)–Diretór Aprovisionamentu iha Institutu Nasionál Farmasia no Produtu Medikamentu (INFPM), Mariano da Silva Marques, hateten ai-moruk Narcotic and Psychotropic (Naps) vial 5.000 sei tama iha fulan-jullu 2024.
Notísia Relevante: Empreza Sali-Magu hatama ona ai-moruk kontentór 6 ba INFPM
Nia esplika, prosesu aprovizionamentu ne’e hahú iha fulan-fevereiru maibé depende ba nasaun manufaktur ba Narcotic and Psychotropic (Naps) ne’ebé normalmente iha durasaun fulan tolu, tanba iha medikamentu Naps hanesan morfin ne’e hola iha kimia farma Indonésia no Fetamil iha nasaun Malázia.
“Tuir ita-nia kuota ne’e vial ka botil 5.000. Maibé iha kompra emerjénsia vial 500 ne’ebé rezolve ona. Kuantidade ida-ne’e sei responde ba iha tinan tomak,” Diretór Aprovisionamentu iha Institutu Nasionál Farmasia no Produtu Medikamentu (INFPM), Mariano da Silva Marques, ba jornalista sira liuhosi konferénsia imprensa, iha Kampung Alor.
Nia garante, daudaun ne’e Institutu Nasionál Farmasia no Produtu Medikamentu (INFPM) asina ona kontratu ho manufaktur lubuk hodi bele halo akizisaun ba ai-moruk Narcotic and Psychotropic (Naps).
Iha fatin hanesan, Diretór Servisu Apoiu Diagnostiku no Terapeutika iha Ospitál Nasionál Guido Valadares (HNGV), Vidal de Jesus Lopes, rekoñese katak menus ka ai-moruk Narcotic and Psychotropic (Naps) laiha ne’e foti husi ospitál referénsia sira hodi halo atendimentu ba kazu emerjénsia.
Nia esplika, ai-moruk Narcotic and Psychotropic (Naps) ne’e kategoria droga ne’ebé utiliza husi sala sirurjia no profisionál saúde sira uza ba hakalma pasiente sira-ne’ebé sente moras.
“Ai-moruk estoke menus ne’e, ami tenta ka solusaun primeiru mak ne’e, ospitál rejionál sira ne’ebé mak iha. Sira iha estoke natoon hodi bele ajuda mai iha HNGV, maibé kompra emerjénsia ami hato’o mai iha INFPM hodi halo kompra tanba tuir lei Narcotic and Psychotropic (Naps) sei kompra husi INFPM de’it,” nia dehan.
Nia hateten, kompra ba emerjénsia ne’e ho kuantidade ne’ebé ki’ik ba iha INFPM hodi bele halo atendimentu ba pasiente sira.
Vidal de Jesus Lopes hateten, ai-moruk stock out iha Hospitál Nasionál Guido Valadares (HNGV) atinje 11% ne’ebé kompostu husi ai-moruk vital no nesesaria inklui Narcotic and Psychotropic (Naps).
Jornalista : Jesuína Xavier
Editór : Cancio Ximenes
