DILI, 16 jullu 2024 (TATOLI)—Banku Nasionál Komérsiu Timor-Leste (BNCTL, sigla portugés), tersa ne’e, inaugura unidade foun iha edifísiu Institutu Nasionál Seguransa Sosiál (INSS) atu fasilita servisu finanseiru hodi refleta kompromisu banku atu serví nia kliente sira ho efikásia no asesibilidade boot.
Prezidente Konsellu Administrasaun BNCTL, Lúcia da Cruz Flor, hateten, inisiativa ne’e reprezenta pasu importante hodi mellora asesu ba servisu bankáriu no finanseiru ba sidadaun Timor-Leste.
“Estabelese unidade BNCTL iha INSS ne’e atu hametin kooperasaun serbisu ne’ebé mak hala’o ona entre parte rua. Ohin ne’e marka kompromisu ida, katak servisu ne’ebé mak ita hala’o to’o ohin loron sai metin no transparante liután, banku ne’e sai hanesan parseiru importante tebes hodi hakbesik-an ba sidadaun sira hotu hanesan kliente banku no setór sira ne’ebé prezente iha rai-laran,” Prezidente Banku Nasionál informa liuhusi nia diskursu iha serimónia ingurasaun unidade BNCTL, iha resintu edifísiu INSS, caicoli.
Unidade foun ne’e nia prezensa bele fasilita pagamentu ne’ebé kliente sira presiza no fasilita benefisiáriu programa Governu sira halo tratamentu dekomentu.
Nune’e mós, unidade ne’e bele fasilita kliente INSS halo tranzasaun kaixa no atendimentu, liu-liu depózita, levantamentu, transferénsia, abertura no taka konta, ativasaun servisu internet banking, rejistu SMSAlert, emisaun kartaun ATM no troka kartaun ATM, fasilita servisu pagamentu kontribuisaun seguransa sosiál no servisu administrativu bankáriu sira seluk.
Notísia relevante : INSS no BNCTL ohin halo ona pagamentu pensaun sosiál faze daruak
BNCTL rasik daudaun sura ho INSS iha ona unidade hamutuk 27 ne’ebé namkari iha territóriu, ajente banku neen, mákina ATM 64, pontu pagamentu (POS) 211 no servisu bankáriu movel 13, neʼebé permite lori servisu bankáriu besik liu ba konsumidor sira iha fatin hotu.
Iha fatin hanesan, Prezidente INSS, Arlindo Pinto, agradese tebes BMCTL tanba konsege halo mudansa sistema pagamentu ne’ebé hakbesik-an ba inan-aman sira liuhusi sentru suku sira iha nivél territóriu.
“Aliende ne’e, BNCTL mós atribui mós kartaun eletróniku hanesan ATM ba ita-nia benesisiáriu hanesan ferik-katuas no defisiénsia hamutuk 15.000,” nia akresenta.
Kooperasaun ida-ne’e nu’udar faze ida atu hakat ona ba mundu dijitalizasaun inklui respeita valoriza ferik-katuas sira ne’ebé durante ne’e luta ba rai ne’e.
“Loos duni, tuir observasaun no relatóriu husi atendimentu públiku iha administrasaun sentrál INSS kada loron iha benefisiáriu 15 to’o 150 halo rekerimentu ba sistema sosiál, administrativu finanseiru 85% liu-liu konta bankária iha BNCTL, tanba ita-nia benefisiáriu liu-liu ferik-katuas sira ninia konta bankária 97% husi BNCTL halo pagamentu,” nia tenik.
Ministra Solidaridade Sosiál no Inkluzaun, Verónica das Dores, husu ba INSS no BNCTL atu ba oin bele serbisu hamutuk nafatin no tau inteterese a’as ba povu.
“Ita serbisu labele hanoin buka pursentu ka ‘untung’ maibé serbisu ba ita-nia tenke ho fuan ho laran, keta haluha ohin loron ita kontente tanba iha ema rihun ba rihun mak oferese nia-an ba rai ne’e,” nia salienta.
Jornalista : Arminda Fonseca
Editora : Julia Chatarina
