LIQUIÇÁ, 22 agostu 2024 (TATOLI)—Autoridade seguransa asegura ona sidadaun feto ida ne’ebé soe bebe iha aldeia 05, suku Fatuhada, postu administrativu Dom Aleixo, munisipiu Dili, hodi submete ba prosesu investigasaun.
“Ohin madrugada iha kazu tentativa omesidu ida, iha ita-nia inan-feton ida ne’ebé mak partus iha haris fatin laran, depois nia partus nia rasik foti hena metan ida bobar iha bebe nia kakorok ho ulun atu lori ba soe iha baleta kuak,” Komandante Polísia Nasionál Timor-Leste (PNTL) munisípiu Dili, Superintendente Xefe Orlando Gomes, informa iha Tibar, kinta ne’e.
Nia haktuir, bainhira sidadaun ho inisiál NC atu lori bebe bá soe, iha viziñu ida haree, halo kedan prevensaun no hamaus inan-feton ne’e atu bele salva bebe referidu.
“Entaun, viziñu ne’e konsege foti duni bebe ne’e lori kedan ba Ospitál Nasionál Guidu Valadares (HNGV, aigla portugés) atu halo protesaun, bebe ne’e ami seidauk identifika mane ou feto, maibé kondisaun bebe nian daudaun di’ak hela no bebe nia mama ami lori mós ba Ospitál Nasionál tanba nia kabun moras, entaun ita lori ba para halo tratamentu, bainhira tratamentu hotu ita sei submete ba prosesu, foti deklarasaun no buka tuir mane ida-ne’ebé fó oan ba inan-feton ne’e,” nia tenik.
Notísia relevante : GMPTL preokupa kazu soe bebé-haforsa sensibilizasaun ba foinsa’e sira
Hafoin rekolla informasaun, PNTL sei submete prosesu ba Ministériu Públiku hodi levanta ba Tribunál Primeira Instánsia Dili.
Iha sorin seluk, Prezidente Repúblika, José Ramos-Horta, kondena maka’as kazu ne’e no husu ba autoridade seguransa atu buka tuir lalais mane ne’ebé fó oan ba sidadaun feto ne’e tanba laiha responsabilidade.
“Triste tebes ho hahalok soe bebe ne’e, ha’u liuhusi oportunidade ne’e atu dehan, karik iha feto ruma mak isin-rua lakoi atu responsabiliza ba labarik ne’e bele lori bá ha’u-nia uma, se la’e Madre sira-nia fatin atu salva bebe, ita labele soe de’it nune’e. Ida-ne’e laiha toleránsia ba mane ida fó oan ba feto ne’e,” Horta tenik.
Jornalista : Hortencio Sanchez
Editora : Julia Chatarina
