DILI, 12 outubru 2024 (TATOLI)—Tribunál Judisiál Primeira Instánsia (TJPID), sábadu ne’e, halo julgamentu ba Investigadór Komisaun Antí-Korrupasaun (CAC, sigla portugés) na’in-rua ho inisiál EFQ no FLGG, ne’ebé envolve krime violasaun segredu justisa, ne’ebé viztu iha artigu 184 husi Kódigu Penál Timor-Leste.
Ministeriu Públiku (MP) akuza arguidu na’in-rua ho krime violasaun segredu justisa, tanba publika mandadu judisiáriu husi Tribunál iha rede sosiál, hafoin halo apreensaun no buska domisiliáriu iha rezidénsia antigu Ministru Asuntu Parlamentár no Komunikasaun Sosiál, Francisco Jerónimo iha munisípiu Liquiçá no Gabinete Ministériu Asuntu Parlamentár no Komunikasaun Sosiál (MAPKOMS) iha Palásiu Governu, iha outubru 2022, liga ho kazu projetu Set-Top Box.
Iha sala julgamentu arguidu EFQ rekoñese katak MP nia akuzasaun loos hotu.
“Sim, momentu ne’e ha’u mak publika duni mandadu judisiáriu husi Tribunál iha ha’u-nia Facebook,” deklara arguidu EFQ ba Tribunál, iha sala julgamentu TJPID, Colmera.
Arguidu hateten, razaun nia publika mandadu judisiáriu iha nia pájina tanba lamenta ho deklarasaun husi antigu Komisáriu CAC, Sérgio Hornai (atuál Ministru Justisa) momentu ne’ebá, ne’ebé hateten ba jornalista sira katak Ministru Francisco Jerónimo nia estatutu ne’e sei hanesan suspeitu hela no seidauk sai arguidu inklui deklarasaun husi Ministru Francisco Jerónimo iha Aeroportu Comoro, bainhira akompaña Prezidente Repúblika, hateten ba jornalista sira katak buska no apreensaun ne’ebé CAC halo hasoru nia ne’e arbiru de’it, la tuir lei no prosedimentu legál, no iha tempu hanesan CAC nia maneira buska ne’e hanesan pembuhan karakter.
Notísia relevante : CAC konstitui MAPKOMS Francisco Jerónimo ba Arguidu
Arguidu esplika, mandadu husi Tribunál ne’e sita katak sidadaun ne’ebé mak ekipa CAC atu halo buska no apreensaun ne’e, nia estatutu hanesan arguidu, enkuantu Komisáriu CAC halo deklasaun konstraditóriu tebes.
“Entaun, momentu ha’u loke Facebook, ha’u haree notísia ne’e ema komesa ataka ha’u-nia pesoál hodi hateten katak ekipa CAC halo buska no apreensaun la profisionál. Tanba ne’e, hanesan Investigadór ne’ebé lidera ekipa sira momentu ne’ebá, ha’u sente ofedidu nune’e ha’u posting mandadu ne’e hodi hatan ba públiku, katak ami halo buska no apreensaun bazeia ba mandadu judisiáriu,” nia konta tuir.
EFQ dehan, liu de’it minutu balun, nia deside apaga fali publikasaun ne’e maibé derrepente sai boot iha públiku no kazu ne’e mai tiha Tribunál, hafoin nia hakfodak katak nia envolve krime violasaun segredu justisa.
Iha fatin hanesan, arguidu FLGG, hateten ba Tribunál katak akuzasaun loos hotu.
Arguidu deklara ba Tribunál katak, nia hanesan Xefe mídia iha CAC, momentu ekipa CAC halo buska no apreensaun, nia la tuir.
“Buska no apreensaun ne’ebé momentu ekipa CAC halo ba Ministru Francisco nia rezidénsia iha Liquiçá no nia Gabinete iha Palásiu Governu, ha’u la tuir tanba momentu ne’ebá ha’u foti hela linsensa anuál nune’e hela de’it iha uma,” nia haktuir.
Arguidu deklara katak, momentu ne’e nia simu kontaktu ida husi investigadór CAC ne’ebé halo hela buska iha Gabinete MAPKOMS, katak daudaun sira halo hela buska iha Palásiu Governu ba Ministru Francisco Jerónimo, maibé ita-nia mídia CAC laiha no jornalista sira mós laiha.
“Entaun hanesan Xefe mídia CAC nian, ha’u iha obrigasaun hakerek informasaun ne’e iha pájina ofisiál CAC nian, katak CAC kontinua halo buska no apreensaun ba Gabinete MAPKOMS relasiona ho kazu Set-Top Box hodi halibur faktu balun tán. Maibé ha’u la públika mandadu husi Tribunál. Ha’u la hatene subtánsia husi mandadu ne’e,” nia afirma.
Arguidu deklara tan katak, hafoin nia públika tiha informasaun hirak ne’e iha pájina ofisiál CAC nian, nia kontaktu kedan jornalista sira hodi ba kobre informasaun ne’e.
Hafoin Tribunál rona tiha deklasaun arguidu na’in-rua nian, Tribunál deside marka fali loron 31 outubru 2024 tuku 17:00 hodi kontinua rona sasin sira-nia deklarasaun.
Julgamentu ne’e prezidente husi Juís singulár José Goncalves, MP reprezeta husi Prokuradór Gustavo da Silva no arguidu sira hetan asisténsia legál husi Defensór Públiku Masçal Masquerinhas.
Jornalista : Natalino Costa
Editora : Julia Chatarina
