DILI, 20 Maiu 2025 TATOLI (TATOLI ) – Prezidente Fundasaun Meskita Annur, Abdullah Said Sagran, sujere ba Governu aposta iha setór agrikola no pekúaria hodi garante hasa’e produsaun alimentár iha Timor-Leste.
Dirijente Fundasaun Meskita Annur hato’o deklarasaun ne’e relasiona ho Aniversáriu Restaurasaun Independénsia ba da-23, ne’ebé selebra iha 20 Maiu, ho tema “Hametin Paz no Dezenvolvimentu”.
“Sidadaun barak moris nu’udar agrikultór, tanba ne’e tenki fó atensaun ba sira. Ko’alia kona-ba agrikultura, teknikamente bu’at ida ne’ebé láfasil. Ita haree iha mundu em jerál ema komesa tama ona ho agro-indústria ne’ebé ajuda dezenvolve sistema agríkola iha rai laran hodi bele esporta produtu sira ba rai liur”, Abdullah Sagran, hato’o ba TATOLI, iha Kampung Alor.
Prezidente organizmu ne’e afirma katak agrikultór sira presiza uza ekipamentu teknokojia avansadu hodi bele aumenta produsaun alimentár iha rai-laran no subliña katak Timor-Leste mós iha riku-soin tasi nian, tanba ne’e presiza Governu apoia roo hodi reforsa kontrolu iha tasi laran ho objetivu kombate atividade peska ilegál.
Abdullah Said Sagran elojia Ezekutivu tanba halo ona dezenvolvimentu iha setór oioin.
Notísia relevante: Abdullah Sagran destaka importánsia promosaun valór amizade no paz iha Timor-Leste
Jornalista: Jesuína Xavier
Editora: Isaura Lemos de Deus
